Dunas e piñeiros en Morouzos: un espazo natural, cultural e histórico

O areal de Morouzos é o máis extenso da ría e sitúase na desembocadura do río Baleo en Ortigueira, (Ortegal). Rectilínea, de area escura e grans medianos, atópase nun entorno rural de mar aberto, polo que o clima adoita ser ventoso e a ondada moderada, o que a fai propicia para deportes náuticos como o windsurf e as motos acuáticas. Para chegar ao areal de 2 km de longo, hai que cruzar polo piñeiral que recibe o mesmo nome, acondicionado por diferentes zonas de baixada marcadas por pasarelas de madeira que protexen as dunas, unha liña costeira formada ao pé da praia. Tamén conta con áreas de descanso con bancos e até grellas para desfrutar do día ao completo. Os camiños serven como inicio de roteiros que seguen pola contorna e poden levar cara á lagoa de San Martiño, formada polo apresamento da liña dunar no extremo do areal, ou cara ao espazo natural das rías de Ortigueira e Ladrido. Finalmente, unha ruta circular conecta a praia con Ortigueira a través dun sendeiro sinalizado e acondicionado pola zona costeira e o paseo urbano. A zona máis concorrida é o terzo central, xa que se atopa perto das instalacións e a ondada é máis moderada. Conta cun elevado número de servizos entre aseos, duchas, papeleiras, limpeza, acceso adaptado para persoas discapacitadas e un aparcadoiro de alta capacidade. Ademais dispón de posto de socorrismo e equipo de vixilancia e salvamento. Fronte a praia pódese divisar a punta de Frade nun extremo, situada moi perto do castro homónimo e da praia de Fornos. No extremo contrario atópase o illote de San Vicente a moi poucos metros da beira, polo que en días de baixamar pódese acceder andando. Ten un alto valor medioambiental na ría de Ladrido e alberga vestixios dun antigo mosteiro. Todo o ecosistema forma parte da área de dominio público marítimo da praia, que alberga unha variedade de ecosistemas de gran valor e compromiso coa preservación da natureza. Ría Ortigueira A ría de Ortigueira ábrese entre o Cabo Ortegal e Estaca de Bares. Considérase Zona de especial protección para aves inscrita no Convenio de Ramsar. Ten uns 10 km de lonxitude e as súas augas bañan os municipios de Ortigueira e Cariño, cara ao sur, convértese en marisma próxima á desembocadura do Baleo e o Mera. Muíño de Mareas O Muíño de Mareas de Senra atópase no fondo oriental da ría de Ortigueira. As obras foron promovidas por un emigrante retornado de Cuba arredor de 1910. O seu funcionamento depende dunha presa que recolle a auga na subida das mareas e utiliza a forza de soltala. É unha construción pequena única na Galiza. Festival do Mundo Celta O Festival Internacional do Mundo Celta de Ortigueira é un dos referentes de música folk en todo o mundo. Comezaba a súa historia no ano 1978 como festival artesanal de carácter folclórico, até o ano 2000, cando comezou a asentarse como o evento musical que é hoxe en día. Mais non é a música a única actividade deste anual evento de xullo, adoitan acompañala diversos obradoiros, exposicións, desfiles e ruadas, eventos para as crianzas... Todos os anos, o público asistente enche a área de descanso da praia de Morouzos, habilitada como zona de acampada durante as xornadas do festival.