Detido un home na Coruña acusado de matar outro dunha puñalada

A Policía española detivo un home na Coruña por supostamente matar outro, que morreu no acto ao recibir unha puñalada no parque de Santa Margarida, perto da porta que dá á ronda de Nelle.

Fontes dos axentes relatan que, arredor das 20 horas do sábado, produciuse un altercado neste punto do centro da cidade, que terminou co apuñalamento dun mozo, que morreu no acto. Aínda se descoñece o tipo concreto de arma empregado e o motivo que desencadeou o suceso.

A Policía Local acudiu ao lugar en primeira instancia e, despois, sumouse a Policía española, que detivo un home como presunto autor destes feitos. Actualmente, atópase en dependencias policiais e, polo momento, descoñécese cando pasará a disposición xudicial.

O caso está a ser investigado pola brigada xudicial da Policía española na Coruña.