Detido un home após agredir a súa parella nun descampado en Lugo

Axentes da Policía Local de Lugo detiveron un home de 50 anos de idade por violencia de xénero após agredir presuntamente a súa parella nun descampado da cidade. Segundo informa o corpo policial, o pasado día 22 de xullo pola tarde unha patrulla da Unidade Territorial de Policía de Barrio da Policía Local foi enviada á Avenida de Paulo Fabio Máximo, á altura dun escampado, porque un home estaba a agredir unha muller.

Os axentes desprazados ao lugar foron recibidos por catro persoas xunto a unha muller tirada no chan. Segundo estas mesmas fontes, o grupo de individuos relatou que "momentos antes" un home agredira á vítima, ausentándose despois do lugar.

Os policías alcanzaron o presunto agresor "a uns cen metros do lugar dos feitos", presentando "signos de embriaguez" e manifestando que a muller que estaba no chan "era a súa parella, pero que non pasara nada". A muller, engade a Policía Local, tamén con signos de embriaguez, "ratifica esa mesma afirmación, descartando a posibilidade de denunciar".

Debido a estas manifestacións, os axentes mobilizados entrevistaron as testemuñas, quen explicaron que "o home agarrou con forza á muller polo brazo, tirándoa en dúas ocasións con violencia ao chan". Así mesmo, os policías observan que a vítima presenta "arañazos nun brazo e unha perna" á vez que "se nega a ser asistida por un facultativo".

Por todo iso, proceden á detención do home, de 50 anos e veciño de Lugo, por un presunto delito de violencia de xénero, sendo trasladado a dependencias policiais onde se instrúen dilixencias para a súa remisión ao xulgado correspondente.