Detectados catro novos casos de gripe aviaria en gaivotas na Galiza
A Consellería do Medio Rural comunicou ao Ministerio de Agricultura, a través da Rede de Alerta Sanitaria Veterinaria, a detección de catro exemplares de gaivota afectados por gripe aviaria de alta patoxenicidade (IAAP), confirmados polo Laboratorio Central de Veterinaria.
En concreto, tres gaivotas foron detectadas na parroquia de Morás, no Concello de Xove, e unha cuarta foi encontrada no Concello de Sada.
Ao tratarse de tres individuos detectados na mesma localización, considéranse un único foco notificábel, polo que se elevarían a 24 o total de focos reportados desde a Galiza en aves silvestres.
A Xunta da Galiza explicou que se trata de catro gaivotas patiamarelas (Larus michahellis) recollidas no marco do Plan de vixilancia da influenza aviaria que desenvolve o Goberno galego.
Os exemplares foron achados mortos e trasladados aos Centros de Recuperación de Fauna Silvestre de Oleiros e do Veral, onde se realizou a preceptiva toma de mostras seguindo o protocolo estabelecido. Os cadáveres foron eliminados de acordo aos procedementos de xestión autorizados.
A nivel estatal, continúan as notificacións de aves silvestres infectadas, tanto migratorias como residentes, e pertencentes a distintos hábitats e familias avícolas: anátidas como patos, cercetas ou gansos, aves de presa como falcóns ou gabiáns e outras especies de distintas familias de aves como garzas, cegoñas, pombas, voitres ou gaivotas.
O virus non ten capacidade de infectar persoas
A Xunta lembrou novamente que o virus circulante non ten capacidade significativa de infección nas persoas, aínda que "por un principio de bioseguridade básica", recoméndase non manipular aves atopadas enfermas ou mortas e notificar o feito aos servizos veterinarios oficiais da Consellaría do Medio Rural ou á Consellaría de Medio Ambiente.