CXT critica que Renfe "empeora" as relacións de media distancia da Galiza mentres mellora as de longa distancia con Madrid, a partir da modificación de horarios que arrinca esta terza feira, en paralelo coa inauguración comercial do novo tramo de alta velocidade Pedralba-Zamora.
"Esta modificación vén marcada pola adecuación dos horarios dos trens de media distancia aos novos horarios dos trens Alvia da relación Galiza-Madrid-Galiza que ao recortar os seus tempos de viaxe modifican o seu paso polas estacións galegas", advirte a central.
Así, CXT afirma non entender "como a cidade máis poboada de Galiza, Vigo, queda fóra do novo servizo ferroviario que Renfe programa a partir de mañá -por esta terza feira- Pontevedra-Santiago-Ourense-Madrid".
"Na política ferroviaria na Galiza os investimentos destínanse á alta velocidade sen mellorarse as liñas convencionais que manteñen as infraestruturas de hai anos"
Ao seu xuízo, sería "o normal" que este servizo comezase en Vigo "evitando a necesidade de transbordo en Pontevedra se algún viaxeiro de Vigo e da súa comarca quere utilizar este tren á primeira hora da mañá".
Ademais, critica "a decisión de eliminar o tren Ponferrada-Vigo con saída da cidade leonesa ás 18,34 e que pasaba por Ourense ás 21,00 horas, deixando sen posibilidade de ir e volver en tren no día aos habitantes de localidades como Monforte, Ribadavia, Filgueira, Frieira, Salvaterra, Caldelas de Tui, Guillarei, Porriño e Redondela".
Na súa opinión, "mentres o tren a Madrid vai máis rápido e recorta tempos os servizos ferroviarios de media distancia entre Ponferrada e Vigo van aínda máis lentos do que xa circulaban e tardan máis tempo, sendo un exemplo da actual política ferroviaria en Galiza, onde os investimentos destínanse á alta velocidade sen mellorarse as liñas convencionais que manteñen as infraestruturas de hai anos".