Curso de horta na casa: Flores comestíbeis

Outra parte positiva é que as flores servirán como atraentes de insectos polinizadores, que axudarán o resto de cultivos da horta a desenvolverse con maior facilidade e dun modo máis óptimo. Moitas das plantas e flores que cultivaremos na nosa horta servirán ademais como repelentes de pragas e insectos que afectarían negativamente os nosos cultivos. Flores sinxelas de cultivar A continuación veremos algunhas das flores máis sinxelas de cultivar, que non precisarán duns coidados moi específicos e que ademais serán moi útiles na horta: —Flor de cabaciña: a planta das cabaciñas dá unhas fermosas e grandes flores de tons amarelos e alaranxados, que están boísimas en tempura. Ademais, son ricas en vitamina A,C, E e K xunto con minerais como potasio, cobre, calcio ou magnesio. A cabaciña ten flores machos e femias, se non queremos diminuír a produción de cabaciñas debemos escoller as flores macho. As flores femias teñen unha especie de cabaciña xusto antes da flor, pola contra a flor macho ten un talo normal e corrente antes da flor. Debemos fixarnos neste detalle para facer uso só das flores macho, xa que de empregar as femias estaremos mermando a produción de froitos. —Dente de león: A flor do dente de león poderemos atopala na horta mesmo sen cultivala, debido a que se trata dunha equivocamente chamada “mala herba”, que medra en calquera curruncho. Do dente de león podemos aproveitar as follas para incorporar ás ensaladas. Estas teñen un sabor bastante forte e amargo, polo que se recomenda picalas e engadilas en pequenos anacos. Porén, a flor é bastante melosa, suave e doce, polo que poderemos incorporala directamente ás ensaladas. —Menta: As flores da menta son máis suaves que as súas follas, pero aínda así dan un toque fresco a calquera prato ou bebida. Podemos usalas para aderezar ensaladas ou para engadir a calquera infusión ou bebidas como limoada. —Caléndula: Esta planta é unha das máis usadas no horto medicinal debido ás súas propiedades antisépticas e antiinflamatorias. O seu sabor é moi agradábel para usar en ensaladas, sopas ou infusións. Para empregalas en ensaladas debemos coller a flor e quitar un a un todos os pétalos para repartilos por todo o prato e, desta maneira, engadir pequenos toques de sabor a toda a mestura. A mellor forma de beneficiarse das propiedades da caléndula é usándoas en sopas ou infusións, mais sen que chegue a ferver. —Lavanda: A flor desta planta ten un lixeiro toque picante e é tremendamente aromática, o que a fai perfecta para combinar con calquera prato doce ou salgado e tamén en infusións. As súas flores secas conservan os seus beneficios e cheiro durante moito tempo. Á lavanda atribúenselle propiedades relaxantes e que melloran o ánimo. —Capuchina: As flores desta planta son das máis coñecidas e utilizadas. Teñen un lixeiro sabor picante e para usalas, por exemplo, en ensaladas é recomendábel picalas finas. Deste modo non notaremos tanto ese sabor forte e engadirémoslle un toque moi interesante ao prato. Consellos para cultivar flores A maior parte das flores comestíbeis poden plantarse perfectamente en testos tanto no exterior como no interior. Aínda que algunhas delas poden mesmo nacer de forma espontánea e libre sen ser plantadas previamente. Para cultivar as nosas flores comestíbeis debemos ter en conta algúns aspectos: —Sementeira: A mellor maneira de facernos con plantas das que aproveitemos as súas flores e follas para comer é a través de sementeiros. Desta maneira podemos controlar todo o proceso das plantas, vixiando as pragas e enfermidades que as poidan atacar, se son sometidas ou non a sulfatos ou produtos químicos etc. —Terreo: A maioría das plantas que vimos anteriormente poden cultivarse tanto no interior como no exterior. No caso de cultivalas no exterior poderemos facelo tanto en testos como en bancais ou no propio terreo onde habilitemos zonas para elas. No caso de plantalas no interior, poderemos facelo perfectamente en testos, que variarán de tamaño e capacidade dependendo do tipo de planta da que se trate. —Rego: Será de vital importancia proporcionar auga suficiente aos nosos sementeiros para que estes poidan xermolar e enraizar dunha maneira axeitada. Unha vez medradas as plantas deberemos informarnos da cantidade de auga necesaria que precisa cada unha para non excedernos nin quedarnos curtos en canto a humidade e auga. —Pragas: Como vimos xa en varias leccións, moitas das plantas aromáticas que temos na horta serven como repelentes naturais de moitas das pragas máis comúns que adoitam afectar aos nosos cultivos. Polo que debemos tentar planificar a horta de tal forma que as flores e plantas aromáticas beneficien o resto de cultivos que temos plantados. Como coller e usar flores? As flores comestíbeis poden ser cultivadas ou apañadas de modo silvestre, xa que algunhas como a menta ou o dente de león nacen de forma espontánea en moitos campos, camiños e hortas. Se as recollemos de modo silvestre debemos ter en conta algunhas cuestións como: —Non apañar plantas ou flores de zonas baixas que sexan de paso e que poidan estar en contacto continuo con persoas ou mascotas. —Non recoller plantas ou flores que estean pegadas a estradas. Tentemos recoller os exemplares que estean en zonas altas libres de defecacións ou ouriños de animais e de contaminación de vehículos. —Sempre tentaremos coller as flores ou follas que teñan un aspecto san, descartando as que teñan pragas, insectos, manchas etc. —Asegurémonos sempre de que estean lonxe de zonas onde se apliquen herbicidas, sulfatos ou calquera produto químico que poida danar a nosa saúde. No caso de plantalas na casa, debemos tentar aproveitar as súas propiedades como aliadas na horta e intentar cultivalas perto de cultivos que poidan verse afectados por pragas ou enfermidades e que poidan ser repelidos por algunhas destas plantas e flores. Así estaremos sacándolle dobre partido: usándoas como repelentes na horta e tamén como complemento aos nosos pratos e dieta. Á hora de usar as flores na comida e nas infusións debemos tentar conservar intactas as súas propiedades, para isto debemos asegurarnos de que non leven lixos nin insectos, pero debemos tentar non lavalas e, no caso de facelo, que sexa de forma moi suave e con auga fría. Cómpre sempre escoller as flores e follas máis vigorosas, de aspecto san e cores vivos, evitando as máis débiles, que parezan estar enfermas, que teñan manchas, pragas etc. Eis unha nova maneira de achegar cor, sabor e propiedades aos nosos pratos e de beneficiar os cultivos da nosa horta! Os 3 'R' na horta: Reciclando materiais como testos para amorodos Os amorodos son cultivos que a pesar do seu pequeno tamaño precisan bastante cantidade de substrato para ser quen de enraizar completamente e deben ter distancia suficiente entre planta e planta para medrar e desenvolverse sen dificultade. É por isto que moita xente decide plantar os amorodos en testos verticais con orificios individuais para cada plantón. Deste modo, sempre manteñen a distancia entre planta e planta, non son tapadas polas malas herbas do terreo e teñen unha gran cantidade de substrato para poder enraizar ademais de ocupar o mínimo espazo posíbel. Podemos reutilizar algúns envases como garrafas de aceite, bidóns e latas ou tubos de PVC como pequeno horto vertical para os nosos amorodos. Debemos realizar orificios duns 5 cm de diámetro que permitan introducir correctamente a planta, mais hai que espaciar para que teñan espazo suficiente para desenvolverse. Non debemos esquecernos de proporcionarlle orificios de saída de auga na base do noso testo. Preparados naturais para a horta. Insecticida de bicarbonato contra a araña vermella O bicarbonato sódico é un grande aliado da horta ecolóxica, servindo como herbicida, insecticida, funxicida... Hoxe veremos como facer un preparado natural con bicarbonato, aceite e xabrón ecolóxico para acabar coa molesta praga de arañas vermellas que no verán afecta en moitas ocasións diferentes cultivos da horta. Que preciso? —1 cullerada de xabrón ou lavalouzas ecolóxico. —1 cullerada de aceite de xirasol. —1 cullerada de bicarbonato. —1 litro de auga. —Un recipiente para facer a mestura. —Unha variña para mesturar. —Un pulverizador. Receita —Primeiro engade nun recipiente unha cullerada de xabrón ecolóxico ou lavalouzas ecolóxico xunto cunha cullerada de aceite de xirasol. —Mestura cunha variña até que estea ben homoxeneizado. —Unha vez mesturado, engade unha cullerada de bicarbonato e un litro de auga. A auga deberá ser da choiva ou dunha fonte. No caso de ser da billa déixaa 24 horas nun recipiente sen tapa para que perda o cloro. —Mestura ben todos os ingredientes e mete o líquido nun pulverizador. Debes remexelo enerxicamente no momento de empregalo. Como usalo? O preparado poderá usarse durante os meses de verán e sempre que faga falla. Debemos identificar as plantas e cultivos afectados pola praga da araña vermella e pulverizalos as veces que sexa necesario, deixando dous días de separación entre aplicación e aplicación. Eco-consello Plantar lavanda no horto axudaranos a repeler os pulgóns, ademais de atraer un gran número de polinizadores como abellas, avelaíñas e bolboretas.