Galiza volve sufrir unha repunta nos positivos por Covid-19 detectados nun día e na súa presión hospitalaria. En concreto, rexistráronse 367 novos casos, 10 máis, nunha xornada na que se practicaron 2.000 PCR menos.
Ademais, o número de hospitalizados rachou a tendencia descendente dos últimos dous días e a cifra repuntou até se situar en 364. Así, aumentaron en sete as persoas ingresadas en unidades convencionais de centros hospitalarios galegos, que suman 309, e en cinco as que permanecen en coidados críticos, que ascenden a 55.
O número de hospitalizados ascenderon en todas as áreas agás a de Lugo-A Mariña-Monforte, onde non se observan cambios, e A Coruña e Cee, na que minduaron pese manterse como a que rexistra un maior número.
En canto ao balance na detección de casos, as áreas sanitarias de Vigo e Santiago-Barbanza volven ser as que máis infeccións reportan, aínda que sexan menos que hai un día. En concreto, a zona da cidade olívica suma 90 casos -dous menos- e a da capital galega engade 84 -sete menos-.
A taxa de positividade das PCR sitúase no 6,3%, dúas décimas máis que o día previo, polo que Galiza volve estar por riba do limiar que establece a Organización Mundial da Saúde (OMS) para dar por controlada a pandemia. Cos datos desta sexta feira, Galiza racha a cadea de seis días consecutivos por baixo desta cifra. Por áreas sanitarias, tan só a de Lugo-A Mariña-Monforte se mantén por baixo, con tan só un 0,2% de positivos nas probas.
No que respecta a os casos activos - a cifra total de persoas que están diagnosticadas de covid-19-, hoxe volveron a repuntar a 5.641 -23 máis nun día-.
Con todo, unha xornada máis as vítimas mortais da pandemia na Galiza subiron e son xa 1.332 tras a morte de cinco persoas nas últimas horas. Dous delas estaban vinculadas a residencias de maiores.
