Covid: Galiza supera as 2.600 vítimas da pandemia con catro novos falecementos, dous en residencias
A Covid-19 provocou o falecemento de 2.602 persoas na Galiza desde que deixou notar os seus efectos no mes de marzo do ano pasado. As últimas vítimas, segundo a Consellaría de Sanidade, foron tres homes e unha muller, dous dos cales finaron nas residencias de maiores nas que vivían.
As autoridades sanitarias explicaron a última hora desta sexta feira que as catro últimas vítimas da pandemia padecían patoloxías previas que complicaron a súa recuperación do coronavirus.
En concreto, faleceron un home de 88 anos usuario do centro Ás Gándaras de Lugo e outro de 81 que estaba na DomusVi de Monforte. Así mesmo, notificáronse os pasamentos dun varón de 90 anos que era atendido no Complexo Hospitalario Universitario de Santiago (CHUS) e unha muller de 72 anos que ficara ingresada no Complexo Hospitalario Universitario da Coruña (Chuac).
Xusto un día antes transcendera a morte de tres pacientes de 57, 81 e 82 anos, no Chuac (as dúas primeiras) e no Hospital Lucus Augusti. Na cuarta feira decorreran os decesos dun paciente de 68 anos do CHUS e de dous doentes -un home de 89 anos e unha muller de 70- no hospital coruñés.
Na terza feira, Sanidade avisou aos medios de outras dúas vítimas que perderan a vida pola Covid-19 o día 6 de setembro. Tratábase, precisamente, doutro residente das Gándaras, de 79 anos, e dun varón de 65 anos que estaba a ser atendido no Chuac.
Malia a baixada dos contaxios e a remisión da quinta onda, o certo é que en canto a mortes a semana xa comezou con malas novas. Entre o 3 e o 5 de setembro aconteceran outros seis pasamentos. O primeiro na pasada sexta feira -aínda que comunicado na segunda feira- dunha muller de 83 anos no Hospital de Fátima en Vigo.
Ademais, o día 4 de setembro produciuse a defunción dun home de 86 anos non CHUF de Ferrol. Xa o 5 de setembro, tivo lugar a morte de catro persoas: tres homes de 77 anos e 92 anos (Chuac) e 91 anos (Chuo), así como unha contaxiada de 96 anos (Hospital Virxe da Xunqueira de Cee).