A Coruña mobilízase pola devolución gratuíta dos terreos da Solana e da Maestranza
A Comisión Aberta en Defensa do Común percorreu o sábado pola mañá as rúas da Coruña para reclamar a devolución dos terreos públicos nos que se localizan o Hotel Finisterre, o complexo deportivo da Solana, os peiraos de Batería e Calvo Sotelo, a Maestranza e o vello cárcere.
A plataforma cidadá percorreu esta mañá as rúas da Coruña para reclamar, máis unha vez, que o Concello recupere de balde os terreos públicos da Solana –actualmente propiedade da Autoridade Portuaria, que llos ten concesionados a empresas privadas que xestionan o Hotel Finisterre e o complexo deportivo Metropolitan-, así como os peiraos de Batería e Calvo Sotelo, a Maestranza e o antigo cárcere.
A mobilización partiu pasadas ás 12h desde a sede da Autoridade Portuaria e rematou media hora após no perímetro da Maestranza, onde tomou a palabra Rosa Quiroga, presidenta da Asociación Veciñal da Cidade Vella, para ler o manifesto da convocatoria e reclamar a devolución gratuíta dos citados terreos para a veciñanza da Coruña.
Próximo acto, un concerto
Dentro da xeira de mobilizacións que impulsa esta plataforma cívica, o próximo acto consistirá nun “concerto pola devolución”, que terá lugar nas próximas semanas no Parrote.