Coronavirus Galiza: a curva de contaxios segue a dobregar mentres se estabiliza a presión hospitalaria

Redacción

03/feb./22 - 11:51 Actualizado: 03/feb./22 - 11:53

Seguinte

Segundo o último informe publicado pola Consellaría de Sanidade, con datos consolidados ás 18 horas desta cuarta feira, os casos activos de Covid-19 soben a 61.716 (1.439 máis que na xornada anterior).

Por áreas sanitarias, 16.051 corresponden á área de Vigo (+441); 13.424, á da Coruña-Cee (+149); 10.265, á de Compostela-O Barbanza (+444); 6.576, á de Pontevedra-O Salnés (+12); 6.366, á de Lugo-A Mariña Monforte (+218); 6.103, á de Ourense-Verín-O Barco (+85), e 2.931 á de Ferrol (+87).

Aliás, nas últimas 24 horas detectáronse no país 5.886 novos contaxios (-77), cunha taxa de positividade das probas PCR de 19,3%. Practicáronse neste tempo 7.639 tests PCR, 6.574 tests de antíxenos e 4.707 probas doutro tipo.

Hospitalizacións

A respecto da ocupación dos hospitais, o Sergas notificou o mesmo número de persoas coa Covid-19 hospitalizadas que hai 24 horas, é dicir, 681, aínda que aumentou a presión en UCI e diminuíu, na mesma proporción, nas unidades convencionais.

Así, hai 44 pacientes ingresados nas unidades de críticos da Galiza (+4) e outros 637 en planta (-4). As áreas sanitarias da Coruña e Lugo concentran o maior número de enfermos en UCI, con doce (sen cambios) e oito (+2) respectivamente. Na área de Vigo hai seis pacientes en UCI con Covid (-1), os mesmos que na área de Compostela (+1); mentres, na área de Pontevedra mantéñense cinco persoas enfermas en coidados críticos, na de Ourense subiron de tres a catro e na de Ferrol tamén medraron, de dous a tres.

Vítimas e altas

Desde o inicio da pandemia curáronse da Covid na Galiza 371.651 persoas, das que 4.442 recibiron a alta epidemiolóxica nas últimas horas. Pola contra, faleceron 2.955 galegos e galegas.

Os últimos decesos comunicados por Sanidade foron os de tres mulleres e dous homes, de idades comprendidas entre os 78 e os 87 anos, e que estaban ingresados nos complexos hospitalarios de Pontevedra, Vigo, Ferrol e Compostela.