Coronavirus Galiza: A pandemia causa 2.800 mortes após transcender 14 novas vítimas
As autoridades sanitarias veñen de comunicar o falecemento de 14 persoas máis por mor da Covid-19. Todas elas estaban sendo atendidas na rede de hospitais galegos e tiñan patoloxías previas que complicaron a súa recuperación.
Os falecementos déronse nos últimos días, mais a Consellaría de Sanidade non comunicou até esta cuarta feira o cómputo global.
Dous dos óbitos decorreron a pasada segunda feira, 3 de xaneiro, nos hospitais de Compostela e Vigo. Alí finaron dous varóns de 86 e 68 anos respectivamente.
Dez nunha xornada
Xa na terza feira perderon a vida outras dez persoas diagnosticadas de coronavirus. Malia que todas tiñas patoloxías previas, chama especialmente a atención a morte dun home de 46 anos que permanecía ingresado no Hospital Universitario Lucus Augusti (HULA).
Outros catro pasamentos notificáronse desde o Complexo Hospitalario Universitario de Ourense (CHOU). En concreto, foron os de dúas pacientes de 79 anos e unha terceira de 98 anos, así como un doente de 74.
O resto de vítimas contabilizáronse nos centros hospitalarios de Compostela -un varón de 88 anos-; Ferrol -un home de 67 anos-; Verín -unha paciente de 92 anos-; Valdeorras -un doente de 90-; e O Salnés, onde non se puido facer nada por salvar a vida dun ingresado de 69 anos.
Os últimos decesos comunicados correspóndense a este 5 de xaneiro, no que faleceron pola Covid-19 dúas doentes de 78 e 93 anos que eran atendidas no Complexo Hospitalario Universitario de Vigo (CHUVI) e no HULA.
Con estas novas vítimas, as mortes relacionadas coa pandemia na Galiza xa son 2.800.