Cooperativistas de Xuxán afectados pola subida do aluguer piden á Xunta que audite a empresa xestora
Cooperativistas de Xuxán exixen "transparencia" á xestora Galivivienda —á que o Executivo galego adxudicou esta promoción— e piden á Xunta da Galiza que faga unha auditoría para ter "control" sobre esta empresa tras o cambio de condicións ao que se viron expostos.
"Pedímoslle transparencia, que non minta e que conserve as condicións iniciais", explicou unha das afectadas por esta situación. "O primeiro que necesitariamos é que a Xunta auditase esta xestora para poder fiarnos e que tivese un control sobre ela", sinalou tras explicar que "o modelo de cooperativa, se non se lexisla e se axusto ao modelo de aluguer e se non hai un control rigoroso sobre a xestora, é moi difícil que saia adiante".
Doutra banda, tamén asegurou que "se están incumprindo algunhas normativas" e apuntou que "en base aos estatutos habería que quitarlle o chan a Galivivienda, convocar outro concurso público e darllo a outra". "Unha situación que non desexamos que suceda", engadiu.
Para os afectados "crear alugueiro social a través dunha cooperativa ten unha serie de complicacións porque está concibida para investidores e propietarios". "Este sistema colócanos en certa vulnerabilidade porque temos todas as obrigacións dun propietario pero non os dereitos", incidiu unha delas para engadir que van "ser inquilinos durante 50 anos e, finalmente, quen recolle eses edificios é a Xunta da Galiza".
En canto ao Ministerio de Vivenda, especificou que hai ingresos que proveñen desta carteira "pero en canto ao funcionamento e á xestión evidentemente a responsábel é a xestora e a responsábel de escoller nun concurso público a esta xestora é a Xunta". "Así como de escoller o método da cooperativa para construír vivendas de aluguer social", reiterou.
En relación á nova proposta de condicións do contrato, apuntou que "agora o problema é como están divididas as entregas de diñeiro" ao considerar que "non son viábeis". "Negámonos a pagar unha achega de capital de 475 euros ao mes durante 10 anos sumados ao alugueiro mensual que rolda de media os 400 euros e pico", concretou. "Acabamos sendo os prestamistas da Xunta para que edifique unhas vivendas sociais que logo quedarán nun banco de vivenda para toda a sociedade", apostilou.
Pola súa banda, a Xunta ofreceu diálogo e colaboración pero entende que a situación vén derivada do Instituto de Crédito Oficial (ICO), algo que negan desde o Goberno estatal e exixen á Administración galega que exerza as súas competencias en materia de vivenda.
Grupo Vivenda Colaborativa
En relación a este caso, o Grupo Galego de Vivenda Colaborativa traslada o seu desacordo "con que proxectos levados por xestoras de cooperativas poidan ser considerados como vivenda colaborativa". Aínda que trasladan o seu apoio aos afectados e confían nunha solución, rexeitan que poida considerarse "vivenda colaborativa".
"En primeiro lugar non existe un grupo humano non empresarial á fronte do proxecto senón unha xestora de cooperativas movida licitamente por un interese lucrativo e, por tanto, a primeira premisa necesaria", sinala sobre a "autoxestión". Ademais, remarca que é "evidente" que os xestores de Galivivienda "non van residir en Xuxán e, por tanto, non van formar parte desta comunidade".
