Continúan os labores de extinción dun edificio incendiado en Pontevedra ante o risco de colapso da cuberta
Os bombeiros de Pontevedra continúan traballando na extinción do edificio incendiado na rúa Marqués de Riestra ante o risco de colapso da cuberta. Segundo detallou a concelleira de Seguridade Cidadá, Eva Vilaverde, ás 1,15 horas da madrugada desta terza feira recibiuse unha chamada na Xefatura da Policía Local alertando do incendio.
Os axentes municipais foron os primeiros en chegar ao lugar do suceso, momentos antes de que o fixesen os bombeiros. Acto seguido procederon ao desaloxo do inmóbel, aínda que algúns dos seus residentes xa estaban a saír por iniciativa propia.
Igualmente foron desaloxados dos seus pisos os veciños dos edificios lindeiros que dan a esa mazá e ao patio interior (edificio número 28 da rúa Oliva) mentres que os números 6A e 6B de Riestra tiveron que abandonar a súa vivenda a través dunha xanela auxiliados polos bombeiros porque non conseguían saír do edificio incendiado.
Eva Vilaverde detallou que no edificio sinistrado vivían 20 persoas en 4 vivendas e que ningunha delas sufriu danos, excepto unha pequena queimadura que sufriu unha destas persoas durante o desaloxo, "polo que nos temos que congratular de que todo quedase nese susto".
O Parque municipal de Pontevedra foi auxiliado polos efectivos do Consorcio contra incendios, concretamente das bases de Ribadumia e do Morrazo, estes últimos acudiron para fornecer auga xa que foron necesarios naquel primeiro momento tres camións cisterna e dous camións cesto.
Trátase dun edificio con pisos, escaleiras e teitos de madeira e cunha cuberta de panel 'sándwich', é dicir, "un material moi inflamábel" polo que "está a ser aínda moi difícil controlar o lume". Nun primeiro momento, controlado o incendio e desaloxados os veciños, os bombeiros empezaron a arrefrialo e procederon a asegurar a zona retirando aqueles materiais que puidesen caer á rúa.
"Sobre as seis da mañá quedou, en principio, case apagado, ou polo menos absolutamente controlado", e unha vez que se fixeron todas as medicións por parte dos bombeiros e comprobado que estaban en situación de seguridade en canto a fumes e materiais tóxicos, autorizouse a entrada dos veciños nas súas vivendas.
Con todo, ao redor dunha hora máis tarde, colapsou a escaleira interior do inmóbel e volvéronse a reavivar as chamas. Pasadas as 11 horas os bombeiros seguían actuando no lugar. Preocupaba a situación da cuberta ante o risco de colapso de toda estrutura de panel 'sándwich' e falso teito de madeira.
Actuaron neste incendio axentes da Policía, Bombeiros de Pontevedra e do Consorcio, e voluntarios de Protección Civil. Ademais achegouse ao lugar unha ambulancia medicalizada. A todos eles, especialmente aos bombeiros, Eva Vilaverde trasladou o seu agradecemento polo traballo que están a desenvolver.
Desaloxados
En canto ás 20 persoas desaloxadas do inmóbel incendiado, as dúas familias que residían nas vivendas da primeira planta foron recolocadas noutros pisos que lles ofreceu o arrendador. En canto aos inquilinos da segunda planta, onde se orixinou o lume, son un total de 12 persoas que foron reacollidas nun piso de titularidade municipal.
O servizo de Benestar está a atender a estas persoas para "pór á súa disposición todos os instrumentos e recursos que sexan necesarios", para atendelos "tanto agora de emerxencia como nos próximos días". Eva Vilaverde indicou que "estas persoas saíron co posto, non teñen nada encima, nin sequera documentación, nin as chaves do coche. Non teñen nin para comer", polo que é precisa esta atención por parte do Goberno municipal.
