20 anos despois, estas son para os colectivos ecoloxistas as "contas pendentes" do 'Prestige'

Ás portas de facérense 20 anos do afundimento do Prestige (13 de novembro de 2002) entidades ecoloxistas alertan de que, dúas décadas despois, a catástrofe podería volver ocorrer porque non se aprendeu "nada".

A asociación ecoloxista Adega critica as "contas pendentes" que deixou o desastre do Prestige hai 20 anos. Aínda que "os impactos da vertedura sobre os ecosistemas naturais fóronse diluíndo co tempo", apuntan desde a asociación, o balance realizado sobre a mortalidade efectiva-estimada das especies atinxiu a máis de 300.000 animais, principalmente aves.

"As poboacións dalgunhas aves peláxicas, como o arao dos cons, non se recuperaron despois do Prestige, considerándose actualmente extintas", sinalan desde Adega.

A asociación tamén denuncia o tratamento dos refugallos. "Desde Adega seguímoslle a pista ao proceso de tratamento das 90.000 toneladas de refugallos do Prestige recollidas na costa. Do total, 60.000 foron almacenadas en Sogarisa [un parque empresarial das Somozas], 20.000 en Cerdeda e outras 10.000 en diferentes puntos".

Ecoloxistas en Acción, que lembran o día en Vigo coa presentación do documental Alegría, insistiu esta sexta feira na necesidade de mellorar a coordinación de medios operativos permanentes e unidades de vixilancia marítima, así como de aumentar a cantidade e a calidade das inspeccións.

A plataforma Nunca Máis estrea este domingo no Pazo da Cultura de Pontevedra o documental 20 anos de dignidade, dirixido por Jose Aragunde, que relata o ocorrido no afundimento do Prestige e a protesta social.

Pola súa parte, Greenpeace recorda que miles de buques con millóns de toneladas de mercadorías perigosas, como o petróleo, seguen pasando fronte ás costas da Galiza.