A concelleira de Seguridade Cidadá do Concello de Pontevedra, Eva Vilaverde, informou esta terza feira que a Inspección de Traballo impediu aos bombeiros de Pontevedra traballar no interior da nave incendiada de Pontesa debido á contaminación por amianto.
O incendio está controlado, é dicir, "a situación de emerxencia xa pasou", pero aínda non foi extinguido, xa que o cereal almacenado no interior segue en combustión permanente e continúan aparecendo novos focos de incendio, polo que se fai necesario o labor de arrefriado do cereal para evitar estes rebrotes no fogo.
Con todo, este labor entraña un serio perigo para a saúde, debido a que "todo o material está contaminado por amianto" procedente da cuberta que ardeu por completo. Por este motivo, a Inspección Laboral impediu esta intervención dos bombeiros.
Con este mesmo problema encontráronse os axentes da Policía Xudicial e Científica da Policía Nacional que levan a investigación sobre as causas deste suceso e que na mañá desta terza empregaron un dron para comprobar a situación na zona.
Eva Vilaverde insistiu en que, nas naves da antiga fábrica de Pontesa, mantense "a mesma polvoreira con todas esas toneladas de gran e de cereal en permanente combustión, pero agora aínda peor, porque están dentro dunha nave que está queimada toda a súa estrutura, sen cuberta e con todo o material contaminado polo amianto".
O Concello reclama a reposición da legalidade
O Concello de Pontevedra acordou enviar oficios á Axencia de Protección dá Legalidade Urbanística (APLU), dependente da Xunta da Galiza, e a Costas do Estado reclamándolles o cesamento completo de actividade e a reposición da legalidade nas instalacións de Pontesa situadas en terreos de dominio público marítimo-terrestre ou en servidume de protección de costas.
Ademais, o Concello solicita a apertura do expediente sancionador contra a compañía Nogar, ao entender que, aínda que exista unha autorización expresa da Xunta para usar estas instalacións para almacenar gran ou cereais, a empresa que xestiona a nave debeu solicitar a licenza municipal de actividade.
