Consumo abre investigación ás grandes xestoras de pisos turísticos por posíbeis prácticas enganosas
O Ministerio de Dereitos Sociais, Consumo e Axenda 2030 abriu unha investigación, a través da Dirección Xeral de Consumo, ás grandes xestoras de pisos turísticos por posíbeis prácticas enganosas, segundo informou esta quinta feira o Departamento que dirixe Pablo Bustinduy. En concreto, esta investigación diríxese a empresas que administran centos de vivendas turísticas en distintas comunidades autónomas e que poderían estar a incorrer en prácticas enganosas e noutras potenciais infraccións da Lei Xeral para a Defensa de Consumidores e Usuarios, explica o Ministerio.
A Lei de Competencia Desleal considera prácticas enganosas "calquera conduta que conteña información falsa ou información que, aínda sendo veraz, polo seu contido ou presentación induza ou poida inducir a erro aos destinatarios, sendo susceptíbel de alterar o seu comportamento económico".
Prácticas fraudulentas
Esta mesma lei recolle no seu artigo 27 algúns supostos do tipo de prácticas que se considerarían enganosas, por exemplo "afirmar de forma fraudulenta ou crear a impresión falsa de que un empresario ou profesional non actúa no marco da súa actividade empresarial ou profesional, ou presentarse de forma fraudulenta como un consumidor ou usuario".
Desta forma, o Ministerio volve pór o foco "en posíbeis prácticas irregulares dentro do negocio dos aloxamentos turísticos" despois de que o pasado mes de xuño abrise unha investigación sobre os anuncios que publican algunhas plataformas de aloxamentos que non dispoñen de licenza turística. Neste caso, a nova investigación aberta por Consumo céntrase nas operacións daqueles pisos turísticos que, incluso tendo licenza, estarían a xestionarse de forma irregular por empresas de intermediación que operan en diferentes lugares do Estado español.
Ademais, o Ministerio empezou a investigar en outubro diversas axencias inmobiliarias que levarían a cabo prácticas abusivas contra inquilinos na xestión do aluguer, como obrigar aos usuarios a pagar unha comisión pola xestión do arrendamento, a asinar contratos temporais sen xustificar a temporalidade ou a aceptar cláusulas irregulares en base á normativa.
Crise da vivenda
"Todas estas iniciativas enmárcanse no obxectivo fixado por Pablo Bustinduy de atallar a crise da vivenda en España", subliña o Ministerio, que reitera que o acceso á vivenda é un dos principais problemas do Estado. "Hai miles de familias que viven ao límite no noso país por mor da vivenda, mentres uns poucos se enriquecen con modelos de negocio que expulsan ás persoas dos seus fogares", manifestou o ministro nalgunha ocasión.
Bustinduy quere pór freo á especulación no sector da vivenda e para iso solicitou a todas as administracións públicas a que, no ámbito das súas competencias, que tomen todas as medidas necesarias para abordar este problema.
Aluguer de tempada e por habitacións
En paralelo, o Congreso debaterá a próxima semana unha proposición de lei do BNG, ERC, Sumar, Bildu e Podemos para limitar o aluguer de tempada e por habitacións. Este texto que foi rexeitado pola Cámara o pasado 17 de setembro, mais que agora inclúe modificacións puntuais para atraer o voto favorábel de Junts.
Ademais, o Congreso, a iniciativa de PSOE e Sumar, instou esta quinta feira o Goberno español a que a empresa pública de vivenda aproveite os inmóbeis que son propiedade da Sociedade de Activos procedentes da Reestruturación Bancaria (Sareb) para destinalos a vivendas sociais e accesíbeis.
Cláusulas abusivas
O Tribunal de Xustiza da Unión Europea (TXUE) admitiu esta quinta feira a posibilidade que unha cláusula sobre o Índice de Referencia de Préstamos Hipotecarios (IRPH) poida ser anulada por falta de transparencia e poida considerarse abusiva, aínda que impuxo unha serie de condicións para que se aprecien tales condicións.
