As conexións do PP coa patronal do xogo da Galiza

A Xunta da Galiza non regatea apoios ao sector do xogo. Sen ir máis lonxe, o pasado 29 de decembro, o Diario Oficial da Galiza (DOG) recollía unha disposición que permitía a casinos, bingos, salas de xogo e locais de apostas permanecer abertos o día de Noitevella até as 23 horas nun total de 39 concellos sometidos aos dous niveis máximos de restricións sanitarias, mentres obrigaba a bares e restaurantes permanecer fechados nesas mesmas localidades a partir das 18 horas. A diferenza de trato en canto a horarios entre a hostalaría e o xogo vén sendo habitual desde o comezo da pandemia. Así, por exemplo, no mes de setembro e outubro as empresas do xogo ficaron excluídas das limitacións de horarios impostas ao ocio nocturno como consecuencia da pandemia, argumentando no Parlamento da Galiza, o director xeral de Emerxencias e Interior da Xunta da Galiza, Santiago Villanueva, que “non ten sentido incluír o sector do xogo no cerre decretado para os restaurantes, bares e pubs porque a súa actividade non ten paralelismo co ocio nocturno” ao “non producirse interacción entre os clientes”. A Xunta da Galiza vai aprobar neste mes unha importante redución de impostos para o sector de xogo. A este respecto, a Lei de Medidas Fiscais e Administrativas para 2021, popularmente coñecida como Lei de acompañamento dos orzamentos, estabelece que nas autoliquidacións que deben presentar as empresas do xogo en 2021 se rebaixe o 20% do que deben pagar en todo 2020 no caso dos casinos e bingos e o 30% e no caso das máquinas ou aparellos automáticos. Ao tempo, sinálase que no caso de que na primeira autoliquidación de 2021 non cheguen á contía que lles permiten aforrarse neste ano, poidan repartir o que lles reste da bonificación nas seguintes liquidacións do exercicio até a esgotar. A patronal do xogo gábase do apoio da Xunta A propia patronal do xogo da Galiza non dubidou en cualificar esta medida como unha concesión do Goberno de Feixoo ás súas esixencias. Nun comunicado de prensa, a Asociación Galega de Empresas Operadoras (AGEO) sinalou que “a Xunta escoitou as demandas de AGEO e anuncia rebaixas de impostos pola Covid-19”. A declaración dos empresarios do xogo chegaron só unhas semanas máis tarde da realización do oitavo encontro da entidade, onde o presidente da mesma, Serafín Portas, esixiu diante do vicepresidente primeiro do Goberno galego, Alfonso Rueda, “medidas urxentes” porque “non podemos ingresar o que non tributamos”. O presidente da patronal do xogo, Serafín Portas está casado coa deputada do PP, Lupe Murillo Solis A influencia da patronal do xogo na Galiza é coñecida. A Asociación Galega de Empresas Operadoras (AGEO), fundada en 1982 e conformada actualmente por 55 sociedades, ten como obxectivos a defensa dos intereses do sector e actuar de enlace entre o mesmo e as diferentes administracións. Segundo o seu presidente, Serafín Portas, “de nós dependen máis de 1.800 empregos directos na nosa comunidade, máis de 756 empresas e delas, case o 95% son de carácter familiar”. Ao tempo, teñen sede na Galiza algúns dos máis importantes operadores do xogo a nivel estatal e cunha notábel presenza internacional. Comar e Luckia son dous exemplos disto. O primeiro deles, fundado na Coruña en 1984, conta con 9 casinos no Estado español e 14 máis fóra do mesmo así como miles de máquinas e máis dunha ducia de salóns de xogo, estando presidido por José Collazo, un empresario con intereses en diversos sectores e moi ligado, en tempos, ao ex alcalde da cidade Francisco Vázquez. O segundo grupo, constituído, tamén, na Coruña, en 1980, está dirixido por José e Alfredo González, con presenza en diversas localidades do Estado, Europa e América e cunha facturación de 564 millóns de euros en 2018. Rueda, Lupe Murillo e Serafín Portas A proximidade do Partido Popular á patronal do xogo é unha crítica de vello das forzas da oposición. O vicepresidente da Xunta da Galiza, Alfonso Rueda, é un habitual dos actos da entidade, ao recaer no seu departamento a responsabilidade do sector. Segundo sinalan a Nós Diario empresarios do xogo, Rueda non adoita fallar ás ceas de aniversario ou aos encontros que anualmente realiza AGEO, sinalando no último deles en outubro de 2020 que “é un sector ordenado e responsábel” e definíndoo como “un dos sectores produtivos máis importantes da Galiza”. Así, estas mesmas fontes destacan a relación persoal de Rueda con Serafín Portas. Serafín Portas é o presidente da Asociación Galega de Empresas Operadoras (AGEO). Empresario cunha longa traxectoria no sector do xogo, primeiro executivo do grupo Recreativos Portas, unha sociedade familiar cunha presenza de décadas no negocio, ocupa desde hai anos a máxima responsabilidade da patronal galega do xogo. A súa xestión á fronte da mesma, segundo puido testar Nós Diario, é moi ben valorada polos asociados que destacan a gran dedicación de Portas á entidade. Serafín Portas está casado coa deputada do Partido Popular (PP) por Pontevedra, Lupe Murillo Solis. Lupe Murillo, actual presidenta do Pontevedra Club de Fútbol e empresaria do complexo pesqueiro, atesoura moitos anos de militancia no PP, exercendo de concelleira na corporación de Pontevedra entre 2007 e 2011 e de parlamentaria desde 2016 na Cámara galega. Politicamente está considerada como unha persoa moi próxima a Alfonso Rueda. A diferenza de trato entre o xogo e a hostalaría O sector da hostalaría está molesto co trato da Xunta da Galiza. Neste sentido critican a existencia dun réxime máis laxo de horarios para casinos, salas de aposta e locais destinados a xogos de azar que para os estabelecementos hostaleiros e a falla de vontade do Goberno galego para pactar co sector as medidas que lle afectan. Ao tempo, nunha recente sentenza, a Audiencia Nacional critica que a Xunta da Galiza apoiase os argumentos da patronal do xogo contra un estabelecemento hostaleiro de Betanzos, sinalando que “semella inclinarse á protección dos intereses financeiros de determinados operadores económicos e non do interese xeral”. As relacións entre a Xunta da Galiza e a patronal do xogo son fluídas. Actualmente están negociando o texto na nova Lei do xogo da Galiza, cuxa entrada en vigor está prevista para este exercicio, após ser paralizada no pasado en diversas ocasións polo rexeitamento dos empresarios do xogo. Malia que as discrepancias continúan nalgunha cuestión, a decisión de Rueda é buscar un punto de acordo, sinalando no pasado mes de outubro que “ten que ser unha lei mirando cara ao futuro, que traia estabilidade para os próximos anos e que teña presente a realidade actual do sector”. “Na Xunta da Galiza traballamos para conxugar os intereses de todos os sectores implicados, sen ceder ás demagoxias, nin á búsquea do titular fácil nin a visións distorsionadas da realidade”, sinalou Rueda en outubro en relación coa futura Lei do xogo da Galiza, unhas declaracións consideradas por moitos como unha auténtica concesión aos argumentos da patronal do xogo, quen cifrou en 40% a caída dos seus ingresos en 2020. Un sector que inclúe na Galiza dous casinos, 11 salas de bingo, 116 salóns de xogo, 10.809 maquinas, 3.811 máquinas de apostas deportivas, das que 543 están en salóns, 244 en casas de apostas e 3.024 en locais hostaleiros.