Condes de Albarei, un referente nas Rías Baixas

A adega Condes de Albarei fundouse no ano 1988 en Cambados, no corazón das Rías Baixas. O minifundio galego fixo que un grupo de viticultores decidiran xuntarse para pór en común a uva que producían os seus viñedos e, desta forma, poder levar a cabo o seu soño: a elaboración de albariños de gran calidade. A ilusión dun proxecto que emerxía con traballo e esforzo deu os seus primeiros froitos no ano 1991. Foi nese momento cando o albariño Condes de Albarei, buque insignia da adega, consegue a medalla de ouro no Challenge International du Vin de Burdeos, un dos recoñecementos máis importantes do panorama vitivinícola internacional. Convertíase, deste modo, no primeiro viño branco do Estado en acadar esta distinción. A partir deste intre, a adega Condes de Albarei expande o seu mercado fóra do Estado español. Ese pequeno grupo de viticultores que se xuntaran en 1988 comezou a crecer, e ese soño co que fundaron a adega comezou a facerse realidade. No camiño destes 35 anos de historia, aconteceron moitos momentos memorables para esta adega. A ampliación das súas instalacións, a elaboración de novos e sorprendentes albariños, as numerosas medallas e distincións á calidade dos seus viños, avances no eido da viticultura, etc. Hoxe en día, Pazo Baión elabora os primeiros viños de pago de toda Galicia Sen lugar a dúbidas, un dos momentos máis importantes foi a compra da propiedade Pazo Baión no ano 2008. Unha aposta forte pero decidida por parte de Condes de Albarei. Dende o momento da súa adquisición, a adega cambadesa emprendeu un importante traballo para devolver o esplendor a unha propiedade con máis de cinco séculos de historia. Hoxe en día, Pazo Baión elabora os primeiros viños de pago de toda Galicia e a propiedade converteuse en todo un referente do enoturismo galego e estatal. Viños e viñedos A privilexiada situación dos viñedos de Condes de Albarei outorga aos seus viños unha gran tipicidade. As vides de albariño desta adega sitúanse no val do Salnés, constituídas en pequenas parcelas propias do minifundio galego. Os viñedos de Condes de Albarei caracterízanse pola elevada idade das súas cepas, así como pola proximidade á ría de Arousa. A súa situación xeográfica permítelles ter solos areosos e ben drenados, perfectos para un clima caracterizado polas chuvias regulares e temperaturas suaves. Estas singularidades son as que fan que os viños de Condes de Albarei posúan ese marcado carácter atlántico. O albariño Condes de Albarei leva case 35 anos sendo a cabeza visible da adega Esta privilexiada situación xeográfica vese completada cun traballo manual, que vai desde o coidado das viñas ata a recollida da uva. Os viticultores de Condes de Albarei 'miman' as súas cepas para vendimar cada setembro o mellor froito posible. O seu buque insignia, o albariño Condes de Albarei, leva case 35 anos sendo a cabeza visible da adega. Cunha coidada selección dos acios de uva albariño procedentes dos pequenos predios, este viño elabórase a partir dos mellores mostos flor da adega para potenciar a pureza varietal da uva albariño. A paixón pola uva albariño levou a Condes de Albarei a focalizar o traballo no seu estudo para, deste xeito, poder elaborar albariños que mostren o gran potencial desta variedade. O resultado deste intenso traballo son viños tan singulares como únicos, por exemplo o seu Condes de Albarei “Carballo Galego” posúe unha fermentación e crianza en barricas de carballo galego; por outro lado, o albariño Condes de Albarei “En Rama” madura lentamente, ata tres anos, dentro dos depósitos de aceiro inoxidable; o seu recoñecido albariño "Enxebre" caracterizouse por ser o primeiro branco do Estado en elaborarse cunha maceración carbónica natural; unha das últimas elaboracións en saír ó mercado foi o Albarei “Áine”, cuxas uvas proveñen de cepas vellas situadas moi próximas á ría de Arousa, outorgando a este albariño un marcado carácter salino; e, por último, Albarei “Orixe”, unha elaboración que responde á forma de facer antigamente os viños, en barricas abertas a base de bazuqueos. Todos estes viños parten do mesmo punto: a uva albariño. E con isto pretenden mostrar o seu potencial sempre marcado pola contorna, as Rías Baixas. Por iso cada botella encerra a ilusión, esforzo e paixón que estes pequenos viticultores poñen neste apaixonante proxecto. Condes de Albarei sempre tivo presente o coidado da calidade da uva. O que só podía conseguirse cun profundo respecto polo medio Proxecto medioambiental Desde a súa orixe, a adega Condes de Albarei tiña moi presente que os albariños de calidade que soñaba elaborar só podían alcanzarse cunha excepcional calidade da uva. E isto só se podía conseguir traballando sempre cun profundo respecto polo medio, pola nosa contorna. Con esta premisa, a adega mantén unha filosofía de traballo fundamentada en xerar o menor impacto medioambiental coa súa actividade. Neste sentido Condes de Albarei conseguiu alcanzar grandes metas como a redución nun 77% das súas emisións de CO2 á atmosfera. Tamén está levando a cabo a incorporación de novas técnicas 100% ecolóxicas para o coidado dos seus viñedos, o que permitiu que nos últimos anos a adega reducise ata nun 30% os seus tratamentos fitosanitarios. Unha das técnicas máis innovadoras, onde Condes de Albarei foi unha das adegas pioneiras en implementala dentro da DO Rías Baixas, foron os dispersores de feromonas. Esta técnica é altamente efectiva e considérase unha alternativa completamente natural ó uso de insecticidas. Outro dos piares nos que esta adega cambadesa leva traballando desde hai anos e o seu compromiso coa reciclaxe. Condes de Albarei consegue reciclar cada ano ao redor de oito toneladas de residuos provenientes do vidro, cartón, aluminio ou cortiza entre outros materiais. Todas estas iniciativas compleméntanse, por un lado, coa participación en diferentes proxectos que traballan neste senso, como é o caso de Viñas Atlánticas, unha iniciativa que emerxe para pór de relevo a capacidade de producir viños na zona das Rías Baixas cun baixo custo ambiental; e por outro lado, cunha boa formación dos seus viticultores nas novas técnicas de cultivo que van encamiñadas a xerar o menor impacto no entorno. Condes de Albarei comezou como un soño para un pequeno pero entusiasta grupo de viticultores do val do Salnés. E foi a ilusión, o traballo e esforzo dese grupo, que cada vez se facía máis grande, o que converteu esta adega galega en todo un referente dentro da Denominación de Orixe Rías Baixas.