Os colexios médicos galegos recorrerán ao Supremo a sentenza do TSXG que avala o sistema XIDE do Sergas
O presidente "acata" o veredicto, pero non o comparte e insiste en que "non cumpre as condicións éticas e deontolóxicas" da profesión.
O Consello Galego de Colexios Médicos decidiu "por unanimidade" recorrer ante o Tribunal Supremo a sentenza do Tribunal Superior de Xustiza da Galiza (TSXG) que avalou a implantación na sanidade galega do sistema XIDE (Xestión Integral da Demanda en Equipo), que permite fixar citas en centros de saúde en función de como describan a doenza os propios pacientes.
Así o acordou a directiva do Consello de Colexios Médicos nunha reunión decorrida esta terza feira, logo de que os maxistrados non puxesen reparo a esta ferramenta que executan os administrativos do Sergas para "dar apoio eficaz á xestión asistencial, dirixida non a ese persoal —que non é sanitario—, senón aos pacientes, que son os seus destinatarios finais".
Fronte a esta consideración, o presidente das e dos médicos galegos, que á súa vez é o do Colexio provincial de Lugo, Eduardo Iglesias, insiste en que o XIDE "non cumpre as condicións éticas e deontolóxicas" da profesión, por tratarse "dunha cribaxe", á vez que denuncia que "vulnera a confidencialidade dos pacientes".
Por iso, o Consello, a pesar de que "acata" o ditame do TSXG, "como non pode ser doutra forma nun Estado de dereito", advirte que non o comparte e, por iso, recorrerá ante o Supremo para "continuar defendendo os intereses dos pacientes galegos e da profesión médica".
De feito, os colexios din estar sorprendidos porque un tribunal "derruba a concepción hipocrática da relación médico-paciente, algo mundialmente aceptado, para lexitimar que un profesional non sanitario poida realizar un acto médico", explica Iglesias.
Neste sentido, o presidente ve "disparidade de criterios" no TSXG, xa que en procesos xudiciais anteriores —como o que anulou a instrución do Sergas que permitía a farmacéuticos renovar receitas sen pasar polo facultativo— si recoñeceu "as funcións que ten cada profesional" de acordo coa lei de ordenación das profesións sanitarias.
Por último, o Consello Galego de Colexios Médicos recomenda á poboación que sempre que necesite acudir a un centro de saúde solicite a atención por parte dun facultativo e que "nunca dea información a persoal non sanitario".