O Colexio de Xornalistas publica un informe e un decálogo para orientar o uso da IA nos medios
O Colexio de Xornalistas vén de facer público A intelixencia artificial nos medios de comunicación: Informe e decálogo de boas prácticas, un informe que pretende servir de guía nun momento de profunda transformación do sector da comunicación. O traballo, elaborado a partir da xornada O impacto da intelixencia artificial no xornalismo: Riscos e oportunidades, decorrida o pasado 7 de abril na Facultade de Ciencias da Comunicación da USC, complétase cos seminarios posteriores organizados co patrocinio da Secretaría Xeral de Medios e coa colaboración da propia Facultade e do Colexio Profesional de Enxeñaría en Informática de Galicia.
O informe aborda os interrogantes máis urxentes que a IA, unha "revolución tecnolóxica que evoluciona de maneira vertixinosa", introduce na práctica profesional: desde os marcos legais e os desafíos deontolóxicos até os cambios organizativos que esixe nas redaccións, pasando polos nesgos tecnolóxicos e culturais, a protección de datos, a trazabilidade das informacións ou a redefinición das tarefas xornalísticas nun contexto de ferramentas automatizadas. O Colexio advirte de que a IA "é xa unha tecnoloxía que chegou para quedar no eido da comunicación", polo que resulta imprescindíbel estabelecer criterios comúns para o seu uso responsábel.
Bases éticas e profesionais mínimas
Xunto ao informe preséntase, aliás, un decálogo de recomendacións, artellado arredor de dez conceptos chave —ferramenta, valores, revisión, responsabilidade, límites, transparencia, diversidade, seguridade, trazabilidade e implicación— que busca fixar unhas bases éticas e profesionais mínimas. O Colexio salienta que debe entenderse como un texto "aberto e en permanente actualización", dado o ritmo acelerado no que evoluciona a IA.
A xornada que deu orixe ao informe contou coa participación de investigadoras e profesionais como Verónica Bolón, Alba Meijide, Patricia Ventura, Alba Chao, Marcus Fernández, Raúl Romar García, Xabier Rolán e Ramón Salaverría, cuxas intervencións están dispoñíbeis na canle de YouTube do Colexio. Así mesmo, o relatorio incorpora achegas dos webinars impartidos por Diego Vázquez, Sergio Aramburu Guillán, Alberto Garnil e Mónica López Golán e Patricia Comesaña Comesaña, accesíbeis na plataforma de formación do CPXG.
O Colexio agradeceu as contribucións de todas as persoas participantes e recoñeceu a colaboración da Secretaría Xeral de Medios, da Facultade de Ciencias da Comunicación e do Colexio Profesional de Enxeñaría en Informática, destacando a necesidade de que o sector avance de maneira conxunta para garantir que a IA se integre no xornalismo sen comprometer os seus principios fundamentais.
