Colectivos afectados por vertedoiros, minas e canteiras poñen o foco no "negocio do lixo"

Media ducia de entidades afectadas polo negocio do lixo na comarca de Santiago xuntáronse por primeira vez para para sinalar a ameaza que representan a contaminación derivada da falta de coidado dos residuos.

"Quen non ten unha canteira a poucos quilómetros de onde vive? E un terreo? Pois en nada xa teñen a contaminación na porta da casa", conclúen.

A plataforma Casalonga Limpa de Residuos (Teo) vén de convocar a un primeiro encontro ás plataformas e colectivos máis próximos cunha problemática similar á súa. Á xuntanza asistiron representantes de plataforma veciñal Mina Touro O Pino Non, da plataforma de afectados polo vertedoiro Santiago-Miramontes, da asociación veciñal Campo do Monte de Nemenzo (Santiago), da asociación medioambiental e cultural A Pedra que Fala (Santiago) e da asociación medioambiental a Rebolta Camanzo (Vila de Cruces).

O negocio do século

O lixo é o gran negocio deste século, defenden. "Os residuos non paran de crecer e o seu tratamamento ou é inexistente ou non respecta a legalidade", denuncian.

Segundo constataron, na Galiza existe "un modus operandi" que guía o tratamento de residuos. Alertan dun incremento sostido do volume de residuos que se xeran e ao tempo que aumentan os beneficios das empresas que os xestionan. 

"Estanse a facer de ouro, pois descubriron que se pode cobrar por tratar os residuos sen facelo e por botalos en calquera burato dunha canteira esgotada sen construír un vertedoiro", afirman os colectivos nun comunicado.

Conivencia da Xunta

O principal problema que advirten é que "a Xunta da Galiza permite e aplaude este tipo de xestións, poñendo paus na roda aos colectivos denunciantes e con escasa ou nula inspección ambiental a estas empresas".

As primeiras inspección serias non chegan até despois de moitas denuncias e queixas por parte da veciñanza que sofre as malas prácticas.

"Calquera pode comprobar a través da información pública que hai máis de 500 canteiras sacadas en concurso público na Galiza que están a mercar empresas do lixo. O negocio está claro, en vez de construír un vertedoiro nos lugares onde a lei deixa, aproveitan o oco das canteiras para botar todo mesturado alí e logo tapar con terra". E isto disfrázano de restauración da canteira, engaden .

Outra forma de operar as empresas para facer negocio, sinalan "é conseguir un predio calquera, aprobar un proxecto para tratar residuos e logo facer pequenas modificacións que non esixen exposición pública para acabar convertendo ese lugar, máis a súa contorna, en pequenos vertedoiros ilegais".

A entidades convocadas pola plataforma Casalonga Limpa de Residuos puxeron en común os problemas derivados da instalación dun negocio de tratamento de lixo, unha agresión ao medio rural cuxas consecuencias económicas e ambientais acabará por empobrecer a calidade de vida e dos recursos naturais, agropecuarios socias e culturais na contorna.