A clase empresarial contra Altri

Impulsa Galicia, sociedade público-privada que naceu en 2021 para "buscar proxectos tractores que puidesen captar fondos europeos Next Generation", disólvese "unha vez constatado o cumprimento do seu propósito fundacional". Esta compañía instrumental estaba participada de forma maioritaria pola Xunta de Galicia (40%), Abanca (38%), Reganosa (12%) e Sogama (10%). Pero o certo é que o seu gran proxecto era "un programa de xestión sostíbel de bosques, pioneiro a nivel mundial, con Altri e Greenalia". En vulgo, a posta en marcha da fábrica de celulosa da multinacional portuguesa en Palas de Rei. Pero por que se disolve Impulsa Galicia? Disólvese porque existe un conflito de intereses entre as principais empresas desta sociedade e o devezo impulsado por Altri-Greenalia e Abanca-Xunta, agora xa en solitario. Porque Abanca está omnipresente no tinglado político-empresarial que Carlos Aymerich denominou en "Recursos de Galicia S.L.". As empresas, unha a unha, foron abandonando o proxecto polo dano reputacional que lles causaba apoiar unha factoría que nada tiña que ver coa propaganda de Altri. Desandar o andado Agora, quen semella que ten intención de desandar é o maior parceiro de Altri, Greenalia, comandada por García Pardo, con múltiples negocios co capital portugués e moi ben conectado co Goberno do PP noutros moitos proxectos, coma os eólicos. O dono de Greenalia é o único socio do proxecto de Palas de Rei á marxe da propia Altri, que sempre se quixo acubillar tras dos socios galegos. A súa empresa Smarttia controla 25% da sociedade promotora da planta, Greenfiber, na que investiu ao redor de seis millóns de euros. En 2023, a pasteira achegou 10,6 millóns para capitalizar Greenfiber a través da súa filial Biogama, mentres que Smarttia inxectou outros 3,5 millóns. Un ano antes, os dous socios contribuíran aos fondos da sociedade con 7,1 e 2,3 millóns respectivamente. Pero en maio Altri adquiriu por 16 millóns de euros Greenalia Forest e Greenalia Logistic, dúas sociedades que conformaban a división loxística e forestal do grupo galego de renovables e que desde 2023 estaban en mans de Smarttia, holding co que o empresario Manuel García Pardo controla a maioría accionarial da compañía coruñesa. A antigamente denominada Greenalia Forest dedícase a xestionar compras a propietarios forestais, así como á venda do produto a madeireiras e outras empresas, entre elas, a propia planta de biomasa de Greenalia en Curtis. A filial Logistics céntrase no transporte do produto. O certo é que, con esta operación, Greenalia abandona a súa principal división forestal. Será tamén o primeiro paso para esquecer o proxecto pasteiro de Palas e centrarse nos seus grandes proxectos, que son os eólicos? Ou xa non lle fará falta a Greenalia afastarse do proxecto da pasteira, pois este xa case os abandonou a eles? Foi esta compra dos portugueses de Altri un xeito de compensar García Pardo, o seu grande parceiro galego, polas perdas que está a soportar cun proxecto que, cada vez, torna máis complicado: ademais de ter quedado fóra dos Perte do Goberno central, a planificación eléctrica aprobada polo Ministerio para a Transición Ecolóxica co horizonte posto en 2030 deixa a factoría sen enganche á rede, cando cobizaban enerxía barata. Á negativa do Goberno central a apadriñar este proxecto súmase agora unha Xunta que semella máis morna no seu apoio polo medo ás consecuencias Amais, a contestación social non só aumenta en intensidade e acada agora o ámbito xudicial. E, á negativa do Goberno central a apadriñar este proxecto, súmase agora unha Xunta que semella máis morna no seu apoio polo medo ás consecuencias. Así que, hoxe por hoxe, non se ollan por ningún lado os fondos públicos que sustentaban o seu proxecto pasteiro. Segundo a última memoria publicada por Greenfiber no Rexistro Mercantil, Altri e Smarttia inxectaron un total de 23,6 millóns de euros á sociedade. Uns fondos que foron destinados a avanzar no proceso de planificación, pero, sobre todo, en intermediación e publicidade. Desa cantidade, a compañía lusa aportou 17,7 millóns de euros, mentres que o resto púxoos o holding que controla a maioría accionarial de Greenalia. Pero o que armou un grande rebumbio na clase empresarial foi o anuncio de Altri de recorrer a planificación eléctrica aprobada polo Goberno central. O recurso de Altri podería paralizar a maior parte dos grandes proxectos industriais galegos. Desde a subestación de Balaídos para a fabrica automobilística de Stenllantis aos proxectos nas Pontes, nas Mariñas ou na costa Ártabra. Chocarían así os intereses de Altri cos das principais empresas que operan en Galiza, incluída Greenalia. Agravado o descontento existente entre parte deste mundo empresarial autóctono non só co capital portugués, senón con Abanca e coa mesma Xunta, estarían retellando, para non mollarse máis do que se mollaron. Altri, Memento mori.