Ceivar denuncia os malos tratos recibidos polo preso Antom Santos
Sinala que o preso independentista foi magoado e isolado após rexeitar ser cacheado sen a bata reglamentaria.
O organismo anti-represivo Ceivar denunciou esta quinta feira (28 de maio) o tratamento denigrante e malos tratos recibidos polo preso independentista Antom Santos na prisión de Dueñas e avanzou que a defensa de Santos presentará unha denuncia perante Institucións Penitenciarias.
Os acontecementos denunciados aconteceron após un vis a vis familiar e cando "tres carcereiros" ían proceder ao cacheo integral do preso. Segundo informan, Santos teríase negado ao cacheo "sen a bata regramentaria" que fixa a lexislación. Perante o rexeitamento do independentista dous dos axentes "comezaron a forcexear con el" mentres "outro simplemente ollaba".
"O saldo desta situación violenta foi que Antom Santos rematou con todo o corpo ateigado de hematomas e posteriormente foi conducido a unha cela de isolamento durante 24 horas en aplicación do artigo 72" do réxime penitenciario. Durante ese tempo o preso negouse a inxerir alimento e após o tempo fixado foi conducido de novo á súa cela.
O organismo anti-represivo denunciaron "enerxicamente" a "impunidade" coa que actúa "o funcionariado dentro das prisións" e lembran as condenas do Tribunal Europeo de Dereitos Humanos ao Estado español por non investigar as denuncias de torturas.
No número 146 do semanario en papel publicamos unha reportaxe a dupla páxina sobre a realidade que atinxe a poboación reclusa nas cadeas galegas intitulado 'O que agochan os muros da prisión'. Podes adquirilo na nosa loxa.
