O caso da muller que supostamente guindaron da muralla de Lugo é arquivado por falta de probas
O Xulgado de Instrución número 2 de Lugo sobreseu por falta de probas o caso iniciado en outubro de 2021 por mor do achado dunha muller con feridas ao pé da Muralla, desde onde se cría que fora lanzada por un home co que, presuntamente, estivera esa noite.
A pesar das dilixencias practicadas, a maxistrada explica que "non aparece debidamente xustificada a perpetración de ningún delito", polo que se procede ao arquivo da causa, como solicitou o Ministerio Público.
En todo este tempo, aclara o auto, a lesionada "non foi capaz de lembrar" o ocorrido esa madrugada, desde o momento no cal se atopaba tomando unha consumición co investigado até que apareceu ao pé da muralla. Ademais, recolle, a muller permanece en paradoiro descoñecido, o que imposibilitou a práctica de máis probas.
Os feitos remóntanse ao 31 de outubro de 2021, cando un transeúnte que paseaba á primeira hora da mañá polas inmediacións da muralla escoitou os berros da muller pedindo auxilio.
Foi evacuada ao hospital, onde permaneceu varios días na Unidade de Coidados Intensivos (UCI) con múltiples fracturas.
Polo caso estaba investigado o mozo que durante esa noite tomou algunhas copas con ela nun local da cidade e xerara unha importante repercusión, dado que algunhas asociacións vinculaban esta suposta agresión ao feito de que a nova, de 23 anos, pertencese ao colectivo trans.
As probas
No auto de arquivo, a xuíza explica que, da declaración da moza estimouse a posibilidade de que se produciu algún tipo de submisión química, dado que non lembraba nada do acontecido.
Por iso, foi solicitada unha proba no Instituto de Medicina Legal da Galiza (Imelga), para investigar "a eventual presenza de substancias na vítima, aínda que a inxesta fose puntual". Con todo, a proba non se chegou a practicar debido á ausencia da denunciante.
En relación ás dilixencias de investigación practicadas, solicitáronse en diversas ocasións as imaxes das gravacións das cámaras de Lugo para determinar se a muller e o presunto agresor estiveron, efectivamente, xuntos no momento dos feitos.
Con todo, apunta a xuíza, estas gravacións sempre deron resultado negativo, "máxime ao se descoñecer cal foi o camiño que conduciu á lesionada até a muralla e a hora á que accedeu á mesma e punto de acceso".
"As dilixencias solicitadas pola acusación relativas ás cámaras foron reiteradas en sucesivas ocasións, dando sempre resultado negativo, non se advertiron cámaras que resten por estudar segundo informou a policía", recolle o auto.