Rosa Crujeiras aposta por Juan Díaz Villoslada como xerente da USC
A candidata ao Reitorado da Universidade de Santiago de Compostela (USC) Rosa Crujeiras presentou esta cuarta feira ás persoas que proporá para ocupar a xerencia e a secretaría xeral da institución en caso de converterse en reitora tras a votación do 11 de marzo. Trátase de Juan Díaz Villoslada, membro da directiva de Sumar Galicia, e da profesora Alicia Villalba Sánchez.
En concreto, Crujeiras propuxo Juan Díaz Villoslada para exercer a xerencia da universidade destacando a súa "dilatada traxectoria na xestión pública", así como a súa experiencia previa como xerente da Universidade da Coruña (UDC) entre os anos 2012 e 2016.
Villoslada, licenciado en Dereito pola USC e funcionario da Xunta e do Concello da Coruña, conta cun perfil especializado en recursos humanos, xestión orzamentaria e planificación. Foi deputado no Parlamento polo PSdeG, formou parte da lista de Inés Rei (PSOE) na Coruña e actualmente é membro da directiva de Sumar Galicia.
Na estrutura de xestión, Villoslada estaría acompañado por Emilio Martínez Rivas, técnico de xestión da USC e antigo alto cargo na Xunta e outras administracións locais e académicas. Segundo explicou a candidata nun comunicado, Martínez Rivas achegará o seu "profundo coñecemento" da institución para colaborar de forma transitoria na implantación dun novo modelo de xerencia.
O labor deste novo equipo de xerencia centrarase, segundo Crujeiras, en dous grandes desafíos estratéxicos: abordar a substitución xeracional do persoal e lograr a simplificación administrativa.
Por outra parte, para a secretaría xeral, a candidata apostou por Alicia Villalba Sánchez, profesora titular de Dereito do Traballo e da Seguridade Social na USC. Villalba, doutora 'cum laude' e responsábel de proxectos de investigación europeos e igualdade laboral, sería a encargada deste órgano "chave para o funcionamento e a gobernanza" da institución.
Finalmente, Crujeiras agradeceu a disposición dos integrantes da súa proposta para formar parte dun proxecto que busca conformar un equipo "sólido, experimentado e con coñecemento" para abordar os retos de futuro da USC.
