Un de cada oito casos activos está nas escolas

Cun aumento de case un cento de casos activos desde a última medición, a pasada sexta feira,  até os 1.181, os centros educativos acumulan xa 12,6% dos casos activos de coronavirus que se rexistran no país, o que significa que un de cada oito dos 9.376 que traslada o Sergas para o conxunto da Galiza.

Hoxe, un día despois de que a Consellaría de Educación presentase o seu plan de ensino virtual para organizar a docencia ante eventuais confinamentos de aulas ou centros, o titular desta área, Román Rodríguez, anunciaba a inminente posta en funcionamento dunha unidade específica para atender os centros escolares no seo da Central de Seguimento de Contactos. 

O obxectivo, segundo trasladan desde a Consellaría, é facer un seguimento da Covid-19 "máis axustado á realidade educativa" e cun reforzo da seguridade sanitaria, a través de recursos como a aplicación Educovid, na que se rexistran os positivos vinculados aos centros, e os Autocovid escola, para realizar probas de detección na comunidade escolar xa en funcionamento. 

O tratamento na detección e xestión de contaxios nos colexios e institutos foi, precisamente, unha das críticas que se verteron onte contra a Xunta após a mesa sectorial que reuniu esta semana os sindicatos co conselleiro de Educación, pasados tres meses e medio da última xuntanza, para avaliar o impacto da Covid-19 neste ámbito e as actuacións adoptadas e por adoptar. 

A CIG-Ensino foi a encargada de trasladar esta queixa do profesorado, equipos directivos e familias, que sinalan a "falta de criterios comúns, claros e transparentes" que fan que a resposta de cada centro a un positivo sexa diferente da do resto, tanto na realización de PCR ás medidas de confinamento e comunicación á comunidade escolar. 

A "opacidade", tanto nas decisións sobre a xestión da pandemia, como dos propios datos, é unha das denuncias que lanzou durante a xuntanza o secretario nacional da CIG-Ensino, Suso Bermello, que lamenta a falta de información "valiosísima" respecto á incidencia da pandemia no ensino para planificar a resposta da Administración, "como cantos casos pertencen a profesorado e cantos a alumnado, cantos a aulas masificadas ou cantos ás distintas etapas educativas".

Na mesma liña, FeSP-UXT reclama á Administración  educativa galega "claridade e transparencia" na difusión de datos, protocolos e medidas a pór en marcha. 

O encontro da pasada segunda serviu ás organizacións sindicais para volver pór sobre a mesa as necesidades que veñen reclamando desde antes do comezo do curso en canto a redución de ratios por aula e a autorización de desdobres, contratación de profesorado de reforzo na distintas etapas, a dotación de material de protección para profesorado e alumnado e rexeitamento aos anteparos ou recoñecemento á condición de vulnerabilidade do persoal de risco das aulas, segundo enumera a CIG. 

Nesta liña, desde CCOO subliñan a necesidade de profesorado para poder garantir os desdobramentos nas aulas, así como as substitucións que se vaian producindo polas corentenas, e instan a Xunta a realizar probas PCR ao persoal substituto, ao reingresado e a aquel que volve dun permiso longo, e igualmente ao persoal auxiliar de conversa, ademais de pedir reforzo nos equipos de limpeza.

Desde ANPE engaden, ademais, a necesidade de dotar os centros de persoal de enfermaría, mentres que desde FeSP-UXT o que piden é un reforzo nos centros de saúde de Atención Primaria por ser "os que neste momento están a dar a cobertura aos centros".

Tamén avaliaron esta terza feira as centrais sindicais o plan para o paso a ensino virtual que a Consellaría de Educación presentou esta semana, pasados case dous meses desde o inicio do curso, e do que CCOO xa pediu a retirada e a súa substitución por un itinerario "consensuado" .

Para a CIG, o documento resúmese na fórmula do "ti vai facendo" coa que se "sobrecarga de traballo e burocracia" as direccións e profesorado, obrigadas a realizar nunha semana un novo horario para as aulas virtuais e un plan de contixencia.

"Non entendemos a urxencia dos 7 días para preparar as aulas virtuais dos centros educativos", concordan desde ANPE, que demanda unha regulación normativa e organizativa dun marco para o teletraballo.

As organizacións lembran tamén as deficiencias de conectividade do territorio galego e os problemas de formación e material para a docencia en remoto.