Brote de coronavirus na Mariña: 26 mostras pendentes de resultado

Os novos casos positivos por  COVID-19 na Mariña lucense elévanse a dez, oito deles nunha mesma familia, segundo confirmou o xerente da área sanitaria de Lugo, A Mariña e Monforte, Ramón Ares.

En concreto, nas últimas horas, detectábanse oito novos casos de coronavirus que pertencen a unha mesma familia da Mariña. A maiores, dúas persoas máis daban positivo por  COVID-19, unha delas ingresada no Hospital da Costa, en Burela.

O xerente da área sanitaria de Lugo, Ramón Ares, confirmábao en declaracións a Europa  Press. Respecto diso, precisou que "a partir do primeiro caso detectado" empezouse a facer "un estudo de contactos" e hai sete persoas máis confirmadas, o que fan un "total de oito na mesma familia".

O contaxio produciuse nunha reunión familiar o pasado 13 de xuño e dos oito infectados do núcleo familiar só dous "presentan sintomatoloxía leve" e todos están "a facer illamento domiciliario", segundo afirmou o xerente da área sanitaria lucense.

Agora continúa o estudo "de contactos" para detectar máis positivos e, segundo o xerente da área sanitaria, "hai 26 mostras pendentes de resultados". Ademais, Ares afirmou que se seguirán "investigando todos os contactos" ata que se teña asegurado "todo o brote". O obxectivo, para o xerente da área sanitaria, é "pechar todos os posíbeis casos" para controlar o citado brote.

A maiores dos oito positivos da mesma familia, tamén se detectaron na Mariña "dous casos máis", como confirmou o propio Ares. Un deles "é un paciente que está ingresado no hospital de Burela", cunha "clínica dixestiva" segundo o xerente da área sanitaria. O outro positivo, "detectouse nun estudo rutineiro" de programación "cirúrxica".