A borrasca 'Joseph' deixa perto de 400 incidencias: inundacións, trens cancelados e varios sinistros con persoas feridas
A borrasca Joseph, nomeada así polo Instituto Portugués do Mar e da Atmosfera, segue os pasos de Ingrid. Se esta trouxo á Galiza principalmente frío e neve, Joseph está a deixar pegada sobre todo en forma de abundantes precipitacións, que levaron a Xunta da Galiza a declarar a alerta vermella en 16 concellos do interior do país, onde tamén se suspenderon as clases e o transporte escolar. "É a primeira vez en máis de 20 anos que se produce unha alerta vermella por choivas", indicou o presidente, Alfonso Rueda. Mais non foi hai tanto. En decembro de 2017 activouse a alerta vermella por fortes choivas na borrasca Ana, que deixou precipitacións por riba dos 170 litros por metro cadrado nalgúns puntos do país.
Os datos de Meteogalicia ás 20 horas desta segunda feira indicaban que as choivas máis abundantes caeran en Santa Comba (Xallas), con 120 litros por metro cadrado, e Lousame (comarca de Noia), con 118. Pola súa parte, en Viveiro (A Mariña) e Cedeira (Ferrolterra) foi onde se rexistraran os principais refachos de vento, con 130 e 124 km/h, respectivamente. Ao feche desta edición rexistráranse un total de 388 incidencias derivadas de 'Joseph', destacando os 30 sinistros de tráfico con 17 persoas feridas leves e tres excarceradas, segundo informou o propio presidente da Xunta da Galiza.
O caudal do río Lérez pasou ao longo do día de 77 a 500 litros por segundo
Entre as máis destacadas, a irrupción na subministración eléctrica en Noia. A luz caeu ás 17.41 horas en Labarta, o que obrigou a fechar a piscina municipal, e despois os cortes estendéronse por diferentes puntos do municipio, indo e vindo, chegando a haber momentos nos que a práctica totalidade do termo municipal estivo a escuras. Tamén se viu afectado o sinal telefónico.
Comunicacións afectadas
A medida que avanzaba a xornada a xornada e as choivas non minguaban ían aumentando as incidencias. Adif anunciaba que debido ás condicións meteorolóxicas adversas suspendía o servizo ferroviario entre Ourense e Compostela (na rede convencional) e entre Ourense e Vigo-Guixar. Aliás, a circulación de trens na liña de largo métrico Ferrol-Oviedo/Xixón estaba tamén suspendida polos mesmos motivos. Ademais, Adif puxo unha limitación temporal de velocidade, durante 48 horas, de 160 km/h en toda a liña Ourense-Santiago para os trens de alta velocidade.
Renfe informou de que para esta terza feira se estabelecerán plans alternativos de transporte para determinados traxectos de trens convencionais na Galiza. Activarase un servizo por estrada no traxecto Ourense-Vigo (na rede convencional) para os convois de Media Distancia e o mesmo sucederá no tramo Ourense-Santiago para os trens da mesma categoría. Por outra parte, estabeleceranse servizos no Eixo Atlántico de largo convencional con "orixe ou destino alternativo" Vigo Urzaiz-A Coruña.
As malas condicións meteorolóxicas levaron a suspender o transporte de ría en Vigo, onde só operaron algunhas conexións á primeira hora entre a cidade e os portos de Cangas e Moaña (O Morrazo). Tamén obrigaron a desviar varios voos que ían aterrar en Peinador (Vigo). A frota estivo amarrada toda a xornada.
Ríos desbordados
As constantes e abondosas choivas tiveron unha especial incidencia no desbordamento de ríos como o Deza, o Verdugo ou o Gallo. Un exemplo do efecto das precipitacións foi o Lérez, que pasaba de ter un caudal de 77 litros por segundo ao inicio da xornada a máis de 500 a media tarde. Os desbordamentos déronse mesmo naqueles concellos que, como Ponte Caldelas (comarca de Pontevedra), non figuraban na listaxe de alerta vermella de afectados pola borrasca. "Non entendo, Ponte Caldelas con inundacións, Mondariz e Balneario tamén, Ponteareas igual... Pero a alerta vermella e para outros concellos.... E os que, por desgraza, habitualmente sofren os desbordamentos, nada", manifestaba unha veciña. Ao tempo, o alcalde do municipio de Vilaboa (comarca de Pontevedra), César Poza, pediu ao Executivo galego que decretase o nivel 2 de emerxencia ante as fortes choivas e a suspensión da actividade lectiva durante a xornada. Poza explicou que tiveron unha mañá "chea de incidencias" e os ríos, sobre todo o Riomaior, sufriron desbordamentos e tamén se produciron cortes de vías. "Estamos totalmente desbordados", sinalou o alcalde. Tamén o de Cuntis (comarca de Caldas), Manuel Campos, pediu á Xunta activar o nivel 2 de emerxencia. O desbordamento dun afluente do río Gallo levou varios veciños e veciñas a retirar aveños dos baixos das súas vivendas.
A Xunta da Galiza prevé que esta terza feira se retomen as aulas en todo o país
O Goberno galego defendeu, tras a petición dalgúns concellos como Vilaboa e Cuntis, de activar o nivel 2 de emerxencia, que "non se aprecian na actualidade circunstancias" que xustifiquen dar este paso.
En canto á suspensión da actividade lectiva, desde a Consellaría de Presidencia apuntaron esta segunda feira a que a previsión é recuperar a normalidade na xornada desta terza feira, após ser esta segunda feira suspendidas as aulas e o transporte escolar nos 16 concellos con alerta vermella. A Xunta da Galiza lembra que a suspensión da actividade lectiva "constitúe unha medida de carácter excepcional".
As choivas persistirán polo menos até a semana que vén
As predicións meteorolóxicas apuntan a que a choiva non marchará en breve da Galiza; xaneiro despedirase con auga e febreiro entrará con auga. Tanto a Axencia Estatal de Meteoroloxía (Aemet) como Meteogalicia coinciden: ao longo destes días haberá precipitacións xeneralizadas, de intensidade diferente e acompañada en ocasións por fortes refachos de vento.
De feito, para mañá chegará unha nova borrasca, que se sumará a un Joseph que aínda esta terza feira vai afectar con forza Galiza. Meteogalicia apunta nas súas predicións que até o día 3 de febreiro –a vindeira terza feira– seguirá a chover. "Xaneiro rematará na Galiza dentro da influencia das baixas presións atlánticas e comezando febreiro nunha mesma situación sinóptica, con vento intenso de compoñente oeste, precipitacións xeneralizadas e episodios de chuvias localmente fortes", informan desde este organismo.
A orixe desta situación está nunha cadea de borrascas que van atravesar o Atlántico estes días, orixinadas por grandas masas de aire frío no hemisferio norte. E a isto engádese "a humidade dun río atmosférico, un corredor estreito de aire moi húmido que transporta gran cantidade de vapor de auga desde zonas tropicais" até a Galiza.
