A avaría nun tren de alta velocidade en Taboadela provoca atrasos no servizo ferroviario

Unha avaría nun tren de longa distancia de alta velocidade está a provocar incidencias na circulación ferroviaria na liña que conecta Galiza coa meseta. O tren LD AV 4546, que realizaba o traxecto Chamartín–A Coruña, permanece detido no cambiador de ancho de Taboadela (comarca de Ourense) debido a un problema no sistema de autopropulsión.

Precisamente este sábado, a acumulación de xeo neste mesmo cambiador provocou atrasos de arredor de unha hora nos trens de alta velocidade, segundo informou Adif. Foi a causa do temporal de neve que trouxo a borrasca Ingrid, que durante a sexta feira e o sábado deixou numerosos atrasos e incidentes no servizo ferroviario galego. Nalgúns casos, chegaron a acumularse perto de dúas horas de demora e algúns pasaxeiros tiveron que se ser transportados por estrada.  

Como consecuencia desta nova incidencia no cambiador de ancho de Taboadela, tamén quedaron detidos o tren LD AV 4564 en Meamán (Baños de Molgas, Allariz-Maceda), en ancho estándar, e o LD AV 4775 na estación de Ourense. A afectación esténdese ao conxunto dos servizos de longa distancia de alta velocidade na zona, mentres Adif traballa na resolución da avaría e na reorganización da circulación.