Así podemos gozar do mellor do Entroido sen saírmos da cociña

Imos facer caso ao noso refraneiro "O Entroido ao tizón, a pascua ao sol, pondo o mandil para estarmos detrás dos fogóns". Seguramente, algunha vez escoitariades Domingo de Entroido larafuzán, comícheme a carne, deixácheme o pan. A verdade é que estamos na época ideal para gozarmos dunha boa cacheira, cocido ou lacón, sempre acompañado de patacas ou cachelos e sen faltaren grelos e garavanzos. Cómpre recordarmos o boa que está a androlla ou o botelo da Fonsagrada, pratos que non poden faltar nestas datas. Porén, se quixermos saír da Galiza e viaxar até outro dos enclaves carnavalescos por excelencia, a nosa parada está na feijoada brasileira. Trátase dun dos pratos típicos do país feito con feixóns negros e carne de porco que se acompaña de arroz. Sen dúbida, un prato que merece a pena descubrir, xa que cando remate o Carnaval, o que nos queda é "Adeus, martes de Entroido, adeus meu amiguiño. Ata o domingo de Pascua, xa non como máis touciño". Lambetadas Para os máis lambóns, hai outro dito, "Día de Entroido e domingo de Pascua, cada larpeiro na súa casa". Unha sobremesa rica e doada de facer son as orellas. Simplemente precisamos fariña, ovos, manteiga, leite e aceite, e se quixermos, azucre para empoar. É un doce que nunca falla e unha delicia para todos. Outra sobremesa que non pode faltar nos nosos fogares, seguindo o refrán "Martes de Entroido, cando has vir? Casquiñas de ovos habedes ruxir, son os freixós ou as filloas". Acompañadas de azucre, canela ou mel, son un verdadeiro manxar. Non hai mellor plan que pasarmos unha tarde facendo filloas para nos converter en expertos viradores capaces de lle dar a volta cos dedos sen nos queimar. Alén diso, non podemos deixar escapar a oportunidade de probar as filloas salgadas ou á pedra e, para os máis atrevidos, as filloas de sangue. No entanto, de deixarmos atrás a tradición, podemos experimentar na cociña e preparar filloas de grelos e enchelas co que máis nos guste. Trátase de unir dous dos nosos pratos típicos e o resultado, xa vos aviso, non está nada mal. Finalmente, para gozarmos plenamente destas datas, cómpre lembrar que podemos vestir un disfrace ou levarmos un anteface, mais tamén podemos usar careta, caranta, carantoña, carauta, caroza ou máscara. Sexa como for, o Entroido está para comermos a lingua.