O alumnado da FP Dual de Coidados Auxiliares de Enfermaría pide poder realizar as prácticas

Actualmente, existen tres FP Dual de Técnicos en Coidados Auxiliares de Enfermaría (TCAE) na Galiza impartidos nas universidades de Vigo, Santiago de Compostela e Ourense.

Segundo unha resolución do ámbito de Política Social publicada no mes de setembro, o alumnado da FP Dual faría prácticas remuneradas en residencias cun convenio con DomusVi, que xestiona a maior rede de residencias de persoas maiores do Estado español, a partir de marzo. Porén, o mes xa está rematando e as estudantes da FP Dual aínda non comezaron o seu período de prácticas.

Tras unha reunión coa coordinadora de DomusVi, preténdese que o alumnado comece as súas prácticas a partir do 12 de abril, data que aínda non se confirmou e que parece, segundo as persoas afectadas, algo optimista.

Esta situación está a suceder nas tres FP Dual de TCAE galegas e nalgunhas FP da área sociosanitaria; en total o número de persoas prexudicadas son arredor de 60, dado que cada FP Dual conta cun grupo de 12 estudantes.

O problema que xorde ante esta situación é que unha gran parte do alumnado contaba con ter xa a remuneración das prácticas. Ademais, como o curso aínda non está rematado, os e as estudantes destas FP seguen a dar clase desde comezos de mes e é posíbel que finalicen os estudos sen ter levado a cabo o seu período de prácticas e residencias.

As persoas afectadas por esta situación afirman que se sinten moi abandonadas e piden que lles dean a posibilidade de realizar as prácticas que se lles prometera nun comezo.