Almeida compara o turismo de Santiago co madrileño
O alcalde de Madrid asegura que tamén “recibimos moitos turistas” e defendeu que sexa a Corporación de Santiago quen sabe “as medidas a adoptar” na capital galega.
Tras completar o Camiño Portugués pola Costa este sábado, o alcalde de Madrid, José Luis Martínez-Almeida, ofreceu declaracións nas que se tratou o tema das actitudes irrespectuosas dunha parte das persoas que peregrinan á cidade.
"Os peregrinos somos conscientes de que obviamente é moi importante o Camiño e que peregrinamos para esta cidade, mais débese conciliar co descanso e a tranquilidade dos veciños”, asegurou Almeida, “dígoo tamén como alcalde de Madrid, que recibimos moitos turistas", indicou.
Con todo, e a pesar de asegurar que "en xeral se comportan moi ben", considera que de darse "algún comportamento inadecuado, hai que tomar medidas respecto diso".
Neste sentido defendeu que quen sabe como actuar é “Corporación de Santiago, que son os que mellor saben os comportamentos inadecuados ou que medidas adoptar”.
Aínda que asegura que estes días viu “un comportamento moi cívico en xeral por parte dos peregrinos” afirma entender “que hai que extremar as precaucións para garantir a convivencia".