Alerta amarela por vento en boa parte do país, con refachos que superan os 130 km/h
A alerta laranxa decretada no litoral atlántico levou a suspender a actividade deportiva no mar.
Case toda Galiza permanecerá esta segunda feira en alerta amarela por fortes refachos de vento, que roldaron o 130 km/h por hora nalgúns puntos.
Ademais de por vento, o sueste, o leste e as comarcas costeiras do noroeste estarán baixo alerta amarela por chuvias.
O nivel de aviso intensifícase e sobe a laranxa por ondada e vento en toda a costa atlántica galega. Así, a Dirección Xeral de Emerxencias e Interior, da Consellaría de Presidencia, Xustiza e Deportes, informou da suspensión da actividade deportiva no mar, tanto federada como do programa Xogade, nos municipios afectados.
Na mañá desta segunda feira os refachos de vento roldaron nalgúns puntos da xeografía galega o 130 km/h. Na Gándara, en Vimianzo (Terra de Soneira), mesmo se excederon, con 130,9 km/h. En Punta Candieira, en Cedeira (Ferrolterra), os refachos rexistrados marcaron o 118,6 km/h e no Penedo do Galo, en Viveiro (A Mariña), o 117,3 km/h.
