O alcalde de Vilaboa pide á Xunta que decrete o nivel 2 de emerxencia e suspenda as clases: "Estamos totalmente desbordados"

O alcalde do municipio de Vilaboa (comarca de Pontevedra), César Poza (PSdeG), pediu ao Executivo galego que decrete o nivel 2 de emerxencia ante as fortes choivas e a suspensión da actividade lectiva durante a xornada desta terza feira.

Poza explicou que tiveron unha mañá "chea de incidencias"e , os ríos, sobre todo o Riomaior, sofren desbordamentos en varios puntos e tamén se produciron cortes de vías. "Estamos totalmente desbordados e, o problema, é que a situación empeora", sinalou o alcalde, que detallou que se puxo en contacto co xefe de emerxencias na súa circunscrición.

Así e despois de que a Xunta da Galiza elevase a alerta para esta teza feira a nivel laranxa, o alcalde pediu aos veciños ás veciñas que extremen as precaucións, limiten os desprazamentos ao imprescindíbel e, ante calquera incidencia, contacten co 112 Galiza.

Tamén, no referente á xornada desta terza feira, o rexedor de Vilaboa pediu que se suspenda a actividade lectiva nos colexios. O obxectivo desta medida, sinalou o alcalde, é evitar desprazamentos de risco e garantir a máxima seguridade de toda a comunidade educativa.