O alcalde de Cuntis pide á Xunta a activar o nivel 2 de emerxencia mentres a veciñanza retira aveños das súas vivendas
O desbordamento do Regueiro de Calvos, un afluente do río Gallo, en Cuntis (comarca de Caldas) acendeu as alarmas e levou varios veciños e veciñas a empezar a retirar aveños dos baixos das súas vivendas, segundo explicou o alcalde, Manuel Campos (PSdeG), que pediu "máxima prudencia" e a activación, por parte da Xunta da Galiza, do nivel 2 de emerxencias.
O rexedor explicou que a situación se foi "complicando" ao longo da xornada, e segundo confirmou Protección Civil, o Regueiro de Calvos desbordouse, polo que hai risco de inundación de varias vivendas na zona de Calvos. Manuel Campos indicou que se manterán "vixiantes" tamén por posíbeis problemas noutros puntos do municipios, incluído o caso urbano, por onde pasa o río Gallo.
Á primeira hora da tarde desta segunda feira, o rexedor difundiu unha mensaxe na que lembrou que o municipio está en situación de alerta vermella e que os servizos municipais de Emerxencias e Protección Civil, debido aos desbordamentos, "non poden asegurar o bo estado das vías nin garantir a seguridade na circulación".
Por iso, Campos insistiu "encarecidamente" en que debe evitarse calquera desprazamento innecesario e pediu non achegarse ás zonas fluviais, como pontes e paseos. "A situación é de risco extremo e moi cambiante. Non poñades en perigo a vosa vida nin a dos servizos de emerxencias, expoñéndovos a situacións de risco innecesarias", rogou o alcalde, que insistiu en pedir a "colaboración" de todos os veciños e veciñas para "evitar desgrazas".
Precisamente por esta situación, o alcalde dirixiuse á Xunta para solicitar que "reconsidere" a súa decisión e opte pola declaración de emerxencia de nivel 2, ou polo menos no municipio de Cuntis, consonte o previsto no Plan de Emerxencias da Galiza. O municipio de Cuntis está entre os 16 concellos do interior que recibiron nas últimas horas o aviso É-Alert por situación de alerta vermella ante a previsión de fortes choivas.
