Galiza sae ás rúas en solidariedade con Palestina cando se fai un ano da agresión de Israel contra Gaza

Cando se fai un ano do comezo da brutal ofensiva de Israel contra a Faixa de Gaza, na que segundo as autoridades gazatís foron asasinadas perto de 42.000 persoas, e coincidindo coa intensificación do conflito cos ataques do Estado israelí contra o Líbano ou o Iemen, unha vaga de solidariedade co pobo palestino percorrerá as rúas de vilas e cidades arredor de todo o mundo.

Entre elas, desde a alameda de Compostela partirá ás 12 horas unha manifestación este domingo, 6 de outubro, convocada pola Coordinadora de Solidariedade Galega con Palestina. Unha convocatoria que se suma ás que decorreron nos últimos 11 meses, pois o movemento galego de apoio a Palestina leva perto dun ano “organizando concentracións e numerosas actividades de denuncia do xenocidio en Gaza e da ocupación de toda Palestina”.

Será unha manifestación na que se denunciará a agresión desmedida e inhumana que soporta o pobo palestino, non só desde o 7 de outubro, senón desde hai 76 anos. Desde a coordinadora galega condenan Israel polas súas "prácticas de violencia extrema" que deixan moitas máis das 40.000 vítimas mortais que están confirmadas. "Falamos de milleiros de desaparecidas e de milleiros de feridas e enfermas que non teñen posibilidade de atención médica".

O movemento Galiza con Palestina denuncia os chamamentos de altos cargos israelís ao xenocidio total en Gaza e á limpeza étnica de toda a Palestina. "Estes chamamentos nos pasados días tiveron como resultado operacións militares en Cisxordania, numerosos asasinatos, secuestros e destrución de zonas urbanas".

Neste sentido destacan que os ataques por terra e aire en Jenín, Nablus, Tulkarén e Tubas tiveron como obxectivo principal os campos de refuxiados, incluíndo ataques a persoal médico e a xornalistas que tentaban informar.

A coordinadora galega denuncia, ademais, que desde outubro de 2023 máis de 652 palestinas foron asasinados fóra de Gaza, incluídas 151 crianzas, máis de 3.300 desprazadas e unhas 12.000 detencións arbitrarias. "Estas son ás verdadeiras reféns, as secuestradas polo exército de ocupación israelí e os colonos".

Condenan, ademais, a Unión Europea “pola súa vergoñenta pasividade”, así como o Goberno de España “que por un lado recoñece o estado de Palestina, mais non cesa o comercio de armas nin aplica accións inmediatas. E non podemos esquecer o goberno galego, quen non foi capaz de aprobar unha declaración institucional pola Palestina e oculta as numerosas conexións e acordos comerciais con Israel".

A Coordinadora Galega de Solidariedade con Palestina urxe a unión de todas as institucións deberían para "actuar con contundencia e romper os acordos académicos, comerciais, económicos e as relacións diplomáticas con Israel". Estas son as “únicas medidas efectivas para parar o xenocidio” do pobo palestino, polo que fan un chamamento urxente ao pobo galego para se mobilizar nunha grande manifestación nacional o vindeiro domingo en Compostela.