[VÍDEO] É posíbel producir enerxía eólica con turbinas sen aspas?

Cando se fala de enerxía eólica pénsase en muíños de grandes dimensións con aspas que miden varios metros de longo e que concentran boa parte das protestas das organizacións ecoloxistas, xa que supoñen un potencial perigo para as aves.

Porén... É posíbel producir enerxía coa forza do vento sen, precisamente, esas aspas? Unha empresa con sede en Ávila, Vortex, está a desenvolver un aeroxerador carente de aspas que funciona grazas á resonancia aeroelástica.

O 'eólico sen pas' consta dun cilindro que "captura a enerxía do vento cando entra en resonancia polo seu efecto aerodinámico, denominado desprendemento de vórtices", e posteriormente transforma a enerxía mecánica en electricidade mediante un alternador con ese movemento oscilante.

O cilindro é ríxido e está deseñado para oscilar coa acción do vento, ficando ancorado á vara ou núcleo. A frecuencia de desprendemento de vórtices, o que permite transformar a enerxía en electricidade, é "proporcional á velocidade da corrente do vento", precisan desde a compañía.

En contraposición cos muíños de aspas tradicionais, sosteñen, estes dispositivos teñen un tamaño moi reducido e o movemento que producen é "inofensivo", xa que, "canto máis grande é, máis lento oscila".

O obxectivo é que estas turbinas, que inicialmente terían unha potencia de 100 watts, poidan situarse en espazos urbanos dada a súa "fácil integración" coa contorna, así como para aproximarse aos centros de consumo dunha forma máis eficiente.

O deseño "simple, de baixo peso e silencioso" do xerador, aseguran, permitirá "facer un uso máis eficiente das materias primas". A ONG SEO/BirdLife traballa nun programa de colaboración para probar estes dispositivos e medir o seu impacto para a avifauna.