Adrián Abella e Brais Ramos, da cervexaría Xuntanza: "Se algún día quitamos a arepa da carta, fan unha manifestación"

—Vostedes son os novos donos da cervexaría Xuntanza, mais xa traballaban no local. Por que escolleron quedar con el?
Adrián Abella: Principalmente porque nós levamos moitos anos aquí. Brais xa vai facer sete e eu cinco.

Brais Ramos: Tamén porque Gonzalo Quiroga, o anterior propietario, é amigo meu.

—E agora cantos son no local?
B.R.: Somos nós os dous; Eli, que está aquí a tempo completo e Arantxa, a medio tempo.

A.A.: Agora no verán somos máis, co aumento da clientela.

B.R.: De feito o outro día estivemos cheos de xente, indo de arriba para abaixo, e díxenlle a Eli: "Acabas de superar a túa primeira guerra". Disto que non sabes onde estás ou que facer, máis segues para adiante. Tamén temos a sorte de que a clientela non se molesta por esperar un pouco, aínda que non adoitan ter que agardar.

—Como foi a reapertura da terraza, que ordenador fechar previamente á pandemia?
B.R.: O feche da terraza foi complicado. Quitárona porque era preciso arranxar un regato que pasa por debaixo das pedras do chan, e despois Gonzalo propuxera montala de novo, mais non lle deixaron. Despois da pandemia da Covid, traballamos durante un verán sen ela, e finalmente decidiuse montar a terraza tal e como a podemos ver agora. Antes era unha plataforma a dous niveis, realizada cunha resina que simulaba unha madeira, era de maior tamaño que a actual e ocupaba máis espazo na praza. Nela fixéronse moitos concertos, desfrutamos de foliadas, albergou actuacións do ciclo musical Feito a Man...

—Que tal é o día a día na cervexaría Xuntanza?
A.A.: Pois pola mañá non abrimos, excepto no Día das Letras Galegas. Na rutina normal abrimos ás seis e media, e a xornada é bastante intensa. A primeira hora é relaxada, no que se enche a terraza, mais despois é un non parar. Sempre hai xente esperando a que se libere unha mesa para sentar.

—Que cervexas destacan dentro da ampla gama que ofrecen?
B.R.: A que sempre se bebe máis e a Estrella Galicia. Non sabería dicir xeralmente as máis populares, porque rotamos a oferta. Agora están de moda as Indian Pale Ale e as Sour, que caen ben no verán, e algunha sidrada.

—E alén das cervexas, que máis destaca na súa carta? A Xuntanza é ben famosa polas arepas...
A.A: O máis demandado son as tapas en xeral, ao final. Mais efectivamente, Gonzalo tivo a grande idea de facer unha arepa de tapa, se algún día a quitamos creo que montan unha manifestación na porta [ri]. Normalmente son sempre a arepa, o pan pizza e algo fixo a escoller, e despois facemos segundo o que teñamos dispoñíbel.

—Por que teñen Nós Diario dispoñíbel para a súa lectura no local?
B.R.: Gonzalo estaba subscrito e nós mantivemos a subscrición. Mais, xa na cuestión persoal, porque é o único xornal en galego. A xente de fóra sorpréndese ao velo, ademais.

Terraza á europea

Despois do feche da icónica terraza do Xuntanza, e tras a pandemia, instalouse unha nova, cun formato canto menos peculiar.

O que antes era unha tarima nivelada, agora é un conxunto de mesas e bancos de madeira, realizados polo carpinteiro Ángel Otero, quen tamén construíu os bancos que hai uns anos se colocaron dentro da Catedral de Santiago de Compostela para os fieis.

As pezas foron feitas á medida, tanto que todas as tardes, antes de abrir o local, Adrián e Brais teñen que colocar cada mesa e cada banco no seu sitio atribuído para que se manteñan equilibrados correctamente.