Administración da Xustiza: Aumentan un 7% os asuntos abertos nos xulgados galegos

O presidente do Tribunal Superior de Xustiza da Galiza, José María Gómez y Díaz-Castroverde, presentou no último día de maio a memoria da actividade xudicial do ano 2020, o ano da pandemia da Covid-19 que levou os tribunais e xulgados da Galiza á suspensión das actuacións xudiciais programadas mais dos prazos procesuais desde o 14 de marzo até o 4 de xuño, de acordo co que aconteceu no resto dos territorios estatais. Así, afirma o presidente do TSXG no arranque do informe xudicial de 2020, "o balance da actividade xudicial do ano 2020 non é só o balance da pandemia. É o balance da nosa adaptación ás circunstancias". Neste sentido, aclara que o resultado non é de todo malo" malia aumentar 7% o número de asuntos en trámite nos xulgados galegos. "Unha cifra que non nos satisfai, pero que asumiríamos como aceptábel cando comezou esta crise". O ano xudicial en cifras Gómez y Díaz-Castroverde asegurou durante a presentación da memoria xudicial que os órganos xudiciais galegos "resistiron ben o gran reto" da Covid-19 xa que as medidas postas en marcha no marco da crise sanitario "evitaron contaxios, non xeraron unha bolsa de asuntos sen resolver e avanzouse no uso das tecnoloxías". Os xulgados e tribunais galegos recibiron o ano pasado 293.692 asuntos, un 11,4% menos que en 2019. Tanto a entrada como a resolución de casos descendeu en todas as xurisdicións. Como consecuencia do confinamento e da suspensión da actividade xudicial non esencial, os órganos xudiciais deixaron 167.450 asuntos en trámite, un 7,4% máis que a finais de 2019, cando estaban pendentes 155.822 procedementos. Esta porcentaxe sitúase por baixo da media estatal, que foi dun 11%. No caso de cidades como Vigo ou A Coruña, situouse no 4 e o 3,4%, respectivamente. Doutra banda, o ano pasado resolvéronse na Galiza 278.961 asuntos, o que supuxo un descenso interanual de 14,3%. Efectos da crise económica En 2020 as demandas de execucións hipotecarias presentadas na Galiza mantivéronse sen variacións. Iniciáronse 772 procedementos, un 1,8% máis que en 2019, cando se rexistraron 758, a cifra máis baixa dos últimos doce anos. Ademais, os xulgados galegos practicaron o ano pasado 1.398 lanzamentos, dos que 1.150, 82,2%, foron consecuencia de procedementos derivados da Lei de arrendamentos urbanos, por falta de pagamento do aluguer. En comparación co mesmo período do ano pasado, o número de lanzamentos caeu un 38,4%, ao pasaren de 2.271 a 1.398. Os xulgados galegos recibiron 94 demandas por ocupación ilegal de vivendas en casos en que os propietarios son persoas físicas, entidades sen ánimo de lucro ou entidades públicas posuidoras de vivenda social. En 2019 rexistraron 145, o que supón un descenso interanual de 35,2%. Avalancha tras os ERTE A memoria xudicial de 2020 tamén recolle o número de Expedientes de Regulación de Emprego. Contabilizáronse 45, un 21,6% máis que en 2019, cando se rexistraron 37. Nos xulgados do social interpuxéronse 5.461 demandas por despedimento, o que representa unha caída d2 3% interanual. O presidente do TSXG admitiu que está previsto unha "avalancha de casos cando os ERTE deixen de estar en vigor", unha circunstancia para a que están a elaborar un plan de actuación específico e para a que piden manter os reforzos necesarios. Gómez y Díaz-Castroverde destacou que neste contexto de pandemia, o labor do colectivo xudicial pasa, tamén, por garantir "os dereitos fundamentais", así como as actuacións para minimizar a repercusión da crise sanitaria. Violencia sobre a muller Os xulgados galegos recibiron o ano pasado 6.097 denuncias por violencia de xénero, o que supón un 7 % menos que o ano anterior, cando se presentaron 6.551. Esta diminución, detalla a memoria, é consecuencia da incidencia da pandemia da Covid-19, sobre todo durante os meses de confinamento, malia permaneceren abertos os xulgados especializados. Na Galiza rexistráronse 6.063 mulleres vítimas de violencia de xénero nas denuncias recibidas en 2020, lixeiramente por riba do exercicio anterior, cando se contabilizaron 5.997. Así, os datos evidencian que as vítimas se mantiveron, pero denunciaron menos. Do total, 672 acolléronse á posibilidade de non declarar como testemuñas, un 83,6% máis que no exercicio anterior. Ademais, nos xulgados de violencia sobre a muller solicitáronse 2.009 ordes de protección e seguridade das vítimas, das cales se adoptaron 1.291. Os xulgados de menores axuizaron o ano pasado a nove persoas por violencia de xénero, fronte ás once de 2019. Pola súa banda, os xulgados de violencia sobre a muller axuizaron 748 persoas, das cales 634 foron condenadas, 84,76 %. Con 43,3 vítimas por cada 10.000 mulleres, Galiza sitúase como a cuarta comunidade coa taxa de violencia de xénero máis baixa do Estado, por detrás de Castela e León (39), Aragón (40,2) e Estremadura (41,4). Actividade telemática A paralización da actividade non esencial motivou a posta en marcha de servizos a distancia, fundamentais para a administración da Xustiza e tamén comisións, charlas e deliberacións en liña. As oficinas de atención á vítima e á cidadanía seguiron funcionando vía telefónica e correo electrónico, e agora, tamén, con cita previa telemática. No ámbito da actuación xudicial, a pandemia acelerou a implantación de novas tecnoloxías que en ningún caso "poderán supoñer unha mingua dos dereitos das partes nin das garantías procesuais". Entre outras ferramentas, destaca a memoria, a Covid-19 impulsou a implantación da sinatura dixital, o visor do expediente xudicial electrónico ou as salas virtuais. Segundo informou a Xunta no mes de abril Galiza dispón de 66 salas dixitais, 34% do total. Situación actual Nun primeiro avance de 2021, o presidente do TSXG sinalou que os asuntos en trámite nos xulgados e tribunais galegos a finais de marzo aumentaron un 4% con respecto ás mesmas datas do ano pasado. José María Gómez y Díaz-Castroverde explicou que, segundo os últimos datos dispoñíbeis, aínda provisionais, no primeiro trimestre deste ano diminuíron os asuntos pendentes. A finais de marzo había en trámite 4% máis de casos que o ano pasado, un dato, dixo, que non é o ideal. A maiores, destacou que os procedementos resoltos no primeiro trimestre de 2021 con respecto ao pasado incrementáronse un 18,5%, mentres que a entrada de asuntos subiu un 12%.