Acabar coa pediatría de familia no sistema sanitario público

Existe un clamor social contra a falta de servizos de pediatría en multitude de localidades de toda Galicia (esencialmente no rural pero tamén en grandes cidades) que se traduce na convocatoria mobilizacións (de protesta contra o peche dos servizos e a falta de pediatras), que se estende como a pólvora. Esta situación iniciouse coa crise do 2008 cando a Xunta de Galicia adoptou a estratexia neoliberal do sistema sanitario público para reducir o gasto público co obxectivo de facer fronte a un problema provocado pola fraude de bancos e as entidades financeiras. Como o gasto sanitario supón en Galicia 30% do gasto público e o de persoal máis de 40% do mesmo, a Xunta tivo claro onde debía meter a tesoira: empezou a suprimir persoal para atender as restricións de gasto público impostas pola Unión Europea. Para cumprir con esta obxectivo a Xunta de Galicia decidiu amortizar as prazas por xubilación de pediatras, postos que foron amortizados para sempre. Nos últimos anos perdéronse 87 prazas de pediatría (22,1% do total). Un total de 81 concellos quedaron sen especialistas en pediatría, o que implica que 64,2% dos municipios galegos, 201 non teñan este servizo (máis de 7.600 crianzas non teñen ningunha pediatra de referencia asignada). A situación vai empeorar Na actualidade, dado que 25% deste grupo profesional ten máis de 60 anos, a Xunta de Galicia ten a vía aberta para deixar sen esta especialidade gran parte dos centros de saúde. Os novos especialistas rexeitan ir a centros de saúde polas malas condicións laborais e a precariedade ás que están sometidos Ademais, os novos especialistas rexeitan ir a centros de saúde polas malas condicións laborais e a precariedade ás que están sometidos; a súa formación é esencialmente hospitalaria (tan só 6% da mesma realízase en Atención Primaria) e as súas condicións de traballo son precarias e penosas ao ter que atender a poboación infantil de diferentes concellos e mesmo comarcas (cunha práctica itinerante ao longo de varias semanas). A maioría dos novos residentes optan pola pediatría hospitalaria como saída profesional en lugar da Atención Primaria, o que impedirá o recambio xeracional. Consecuencias 1.—As prazas de pediatría de Atención Primaria están ocupadas por médicos que carecen de formación nesta especialidade (superan 15% do total) o que implica que miles de nenos son atendidos por persoal sen formación especializada. 2.—A poboación menor de 14 anos perdeu o dereito a unha asistencia sanitaria pública próxima e continuada, o que vulnera a Constitución, a Lei Xeral de Sanidade e a Lei Galega de Saúde. 3.—Ponse en risco a saúde e a calidade da atención desta poboación, dado que os médicos de familia carecen de formación específica nos problemas de saúde das crianzas, que non son os mesmos que nos adultos. Existe evidencia de que as nenas e nenos que non son atendidos por pediatras perden a promoción e prevención da saúde, o dereito a gozar do Programa do Neno San (que inclúe os controis periódicos de saúde e do seu desenvolvemento) ou teñen peores coberturas das vacinacións. 4.—Discrimina a poboación rural e ás familias con menos recursos económicos (moi importante en Galicia) ao obrigalas a realizar desprazamentos de varios quilómetros para que o seu fillos sexan atendidos, incrementando así a desigualdade social. 5.—Empeora as condicións de traballo do persoal de pediatra que debe traballar nunha condicións de elevada penosidade. Que pretenden o conselleiro e a Xunta con esta política? 1.—Acelerar o desmantelamento da Sanidade Pública. 2.—Acabar coa pediatra en Atención Primaria. Nunha entrevista recente o Conselleiro de Sanidade recoñeceu hai uns días que vai pechar a pediatría dos centros de saúde para concentrala na cabeceiras de comarca, afastando aínda máis as familias que viven no rural do dereito a unha atención próxima, continuada no tempo e de calidade para os seus fillos. 3.—Favorecer a privatización, dado que as familias recorrerán á sanidade de pago ou contratarán seguros privados complementarios para a atención dos seus fillos e fillas. (O Partido Popular en Andalucía acaba de propoñer o apoio de centros de atención primaria privados como complemento á sanidade pública).