A Coruña sae á rúa na III Marcha Cívica pola devolución da Casa Cornide
A entidade Defensa do Común organizou este sábado a III Marcha Cívica para reclamar que a Casa Cornide, na actualidade propiedade da familia do ditador Francisco Franco, siga os pasos do Pazo de Meirás e se incorpore ao patrimonio público.
A marcha, que conta co apoio de máis dun centenar de entidades (con representación política, sindical e de organizacións memorialistas), saíu da Praza de María Pita, cun cartaz co lema 'Que devolvan todo o roubado, despois do Pazo de Meirás, recuperación para o pobo da Casa Cornide'.
A manifestación tivo un marcado carácter reivindicativo, pero tamén lúdico, e foi encabezada polos actores Fernando Morán e Isabel Risco, caracterizados como o ditador Francisco Franco e a súa esposa, Carmen Polo.
Os promotores sosteñen que o Pazo de Meirás e a Casa Cornide "son dúas caras dun mesmo espolio" e lembran que o pleno da Corporación municipal coruñesa xa aprobou varias mocións para a recuperación deste inmóbel para o pobo da Coruña.
"Como dicía a moción aprobada o 1 de outubro de 2020: "Significados franquistas que promoveron e participaron activamente nestes dous espolios aínda conservan na Coruña rúas, retratos en edificios públicos, placas e todo tipo de distincións, que non se pode admitir nunha sociedade democrática", advirte Defensa do Común.
Esta é a terceira ocasión na cal se organiza unha marcha deste tipo, aínda que os promotores advertiron de que están dispostos a organizar as que sexan precisas para lograr a incorporación ao patrimonio público da Casa Cornide.
"Operación de Estado"
Non en balde, consideran que a adquisición da Casa Cornide foi "unha auténtica operación de Estado que se organizou durante varios anos". "Non podía aparecer como a transmisión dunha propiedade pública a unha persoa privada como Carmen Polo, esposa de Franco, e por iso a solución foi convocar unha poxa previamente amañada", sinalaron.
A Casa Cornide foi comprada en 1948 pola Dirección Xeral de Belas Artes (Ministerio de Educación). Con Alfonso Molina como alcalde pasa a propiedade municipal, mediante un expediente incoado en 1958 e formalizado en xuño de 1962 a través dunha permuta co Ministerio de Educación Nacional, que recibe a cambio unha parcela municipal.
Poucos días despois de dita permuta, Sergio Peñamaría (sucede a Alfonso Molina como alcalde o 19 de maio de 1959), tramita a venda e o pleno do 3 de xullo de 1962 acorda a venda do palacio e tamén as bases para unha poxa que decorre un mes despois. Barrié gaña, lembra Defensa do Común, "poxa-farsa" decorrida o 2 de agosto de 1962 e adquire a Casa Cornide por 305.000 pesetas.
Esa mesma tarde o pleno da conta que Barrié solicita transmitir a propiedade a Carmen Polo. Tres días despois, lembran, vendeu a casa a Carmen Polo por 25.000 pesetas, como figura na escritura.