A autopsia á muller achada morta en Nogueira de Ramuín non é concluínte

A autopsia preliminar da muller achada inconsciente e case espida en Nogueira de Ramuín (Ourense), e que faleceu despois no hospital, non é concluínte con respecto a determinar a causa da morte, co que será necesario continuar investigando e realizando novas probas ao cadáver con todas as hipóteses aínda abertas.

A muller, malferida, foi localizada ao redor das 10 horas desta cuarta feira nunha pista forestal entre Malburguete e O Tuxedo, en Nogueira de Ramuín.

Atopábase tendida perto dunhas casas abandonadas e presentaba un golpe na cabeza, aínda que aínda estaba viva. Estaba espida de cintura para arriba e a súa roupa atopábase esparexida pola zona.

A vítima, de 62 anos e nacionalidade ucraína, era veciña de Requeixo, onde residía co seu marido, tamén estranxeiro, desde hai uns dous anos.

O particular que localizou a muller deu o aviso ao 112 Galiza e até a zona foi mobilizada unha ambulancia do 061, que a trasladou aínda con vida ao Complexo Hospitalario de Ourense, onde faleceu ás poucas horas.

Investigación

Tamén compareceron axentes da Garda Civil que, desde entón, manteñen aberta unha investigación con todas as hipóteses para esclarecer o que lle pasou á muller.

O ministro do Interior, Fernando Grande-Marlaska, referiuse esta quinta feira ao caso para confirmar que están "abertas todas as posibilidades" de investigación.