90% das prazas nas residencias de maiores da Galiza son de xestión privada

A Galiza conta cunha taxa de 14,51 centros de maiores por cada 10.000 persoas de 80 anos ou máis, unha cifra case catro puntos máis baixa que a media estatal, segundo o primeiro Censo de Centros Residenciais de Servizos Sociais no Estado español, que recolle datos de 2022, publicado polo Instituto de Maiores e Servizos Sociais (Imserso) do Ministerio de Dereitos Sociais, Consumo e Axenda 2030.

Tal e como recolle o documento, 345 dos 5.188 centros deste tipo que hai no Estado español están na Galiza. Así, a medida estatal é de 18,11 centros por cada 10.000 persoas maiores de 80 anos.

O estudo aborda tamén outro tipo de centros como os destinados a persoas con discapacidade, dos que hai en todo o Estado un total de 1.455, dos cales 66 están na Galiza. Más polo miúdo, o conxunto do Estado español dispón de 4,35 centros por cada 10.000 habitantes con discapacidade; un cifra que baixa até os 3,13 no caso da Galiza.

75% dos centros de maiores son privados

Ademais, no caso de centros dirixidos a persoas maiores, o 75% son privados, fronte ao 25% de titularidade pública. Respecto aos centros dirixidos a persoas con discapacidade, o 80% son de titularidade privada fronte ao 20% pública.

En relación cos modelos de xestión, o informe do Imserso sostén que, a nivel estatal un 14% das residencias de persoas maiores son de titularidade e xestión pública, unha porcentaxe similar ao dos centros de persoas con discapacidade, que alcanza o 13,7%.

Na Galiza, o documento reflicte que o sistema residencial galego ofrece 21.389 prazas a persoas maiores distribuídas entre 325 centros. Deste total de prazas, 16.705 son de titularidade e xestión privadas, 2.562 prazas son de titularidade pública e xestión privada; e as 2.122 prazas restantes son de titularidade e xestión pública. Desta maneira, o informe conclúe que 90% das prazas residenciais para persoas maiores na Galiza son de xestión privada.