Máis de 40 localidades galegas mobilízanse hoxe en solidariedade con Palestina
Concellos de todo o país acollen concentracións para denunciar o xenocidio en Gaza e a agresión continuada de Israel contra o pobo palestino.
A solidariedade coa Palestina volve ás rúas galegas esta segunda feira, 22 de setembro, cunha rede de concentracións convocadas en 44 localidades. As mobilizacións, impulsadas pola Coordenadora Galega de Solidariedade coa Palestina, teñen como obxectivo repudiar a permanente agresión sionista, o xenocidio en Gaza e as últimas accións de barbarie practicadas por Israel.
As citas desenvolveranse ás 20 horas —agás en Chantada e Monforte, ás 20.30 horas— en espazos céntricos das vilas e cidades. Entre elas destacan A Coruña (Obelisco), Compostela (Praza do Toural), Vigo (Praza da Farola de Urzaiz), Lugo (diante do Concello), Ourense (Subdelegación de Defensa), Ferrol (Praza do Concello) ou Pontevedra (Praza da Peregrina). Tamén haberá actos en vilas como Carballo, Cangas, Allariz, Betanzos, Celanova, Chantada, Corcubión, Foz, Melide, Monforte, Noia, O Barco, O Carballiño, O Porriño, Ponteareas, Pontedeume, Redondela, Ribadavia, Ribeira, Salvaterra de Miño, Sarria, Sober, Silleda, Tui, Verín, Viana do Bolo, Vilagarcía de Arousa, Vilalba, Vilar de Barrio ou Xinzo de Limia, entre outras.
Son xa 44 as localidades da Galiza que este 22 de setembro sairán ás rúas a repudiar a permanente agresión sionista contra o pobo da #Palestina, o xenocidio en #Gaza e as últimas accións de barbarie practicadas por Israel. #GalizaConPalestina pic.twitter.com/QN4qthu0aT
— Mar de Lumes (@mardelumes) September 21, 2025
Desde a Coordenadora subliñan que a poboación galega leva meses mobilizándose de forma constante e que a resposta cidadá destes 44 puntos demostra que a causa palestina é sentida como unha loita xusta e propia. Nas concentracións haberá lectura de manifestos e chamamentos para que as institucións galegas e do Estado rompan relacións diplomáticas, comerciais e militares con Israel.
Manifestación nacional
Estas mobilizacións descentralizadas son a antesala da manifestación nacional que terá lugar en Compostela o vindeiro domingo 5 de outubro, con saída ás 12 horas da Alameda. Baixo o lema "2 anos de xenocidio e 77 anos de ocupación", o obxectivo é converter as rúas da capital galega nun clamor contra o xenocidio recoñecido pola ONU e a prol da defensa dos dereitos do pobo palestino.
Organizacións como Mar de Lumes, Galiza por Palestina e outras entidades sociais anunciaron que se habilitarán autobuses desde diferentes comarcas para facilitar a participación na cita de Compostela. Ademais, xa se preparan materiais de difusión, manifestos e adhesións para sumar apoios a unha mobilización que aspira a ser histórica.
O lema central da convocatoria lembra que a situación de Palestina non é unha crise puntual, senón unha realidade múltiple: xenocidio, ocupación, bloqueo e violencia estrutural, mais tamén resistencia e solidariedade internacional. A Coordinadora insiste en que a presión cidadá é fundamental para "rematar coa barbarie".
