Nas anteriores vagas da pandemia da Covid o persoal sanitario dos hospitais foi quen máis sufriu, entre o conxunto do cadro de persoal da sanidade, o golpe emocional e psicolóxico dun virus que veu para pór todo patas arriba.
Mais agora, nesta sexta onda, está a ser o persoal de Atención Primaria o que máis padece esas consecuencias. "Hai compañeiros de baixa pola presión que implica todo isto", recoñece o médico de Outes, Xosé Dios, a Nós Diario. Son ducias de pacientes a atender cada xornada, labores propias de rastrexo, tramitacións de baixas nunha vaga que multiplica por máis de catro o número habitual de IT (Incapacidade temporal), ter que asumir o malestar de moitas pacientes polas horas de agarda... "Todo suma e, claro, é lóxico que a presión afecte", afirma Dios.
Riscos
María Xosé Abuín, da CIG-Saúde, lembra que a Administración activou un plan de risco psico-social 2022-23 mais considera que hai moito máis que achegar ante a situación do persoal sanitario que, engade, non pode desligarse do "estrés" e "carga" derivados da escaseza de persoal. César Leal, de Enfermaría, afirmou que "é moi importante abordar os problemas de saúde mental dos profesionais sanitarios ofrecendo recursos".
A máis
Juan José Tirado, presidente do Consello de Enfermaría valenciano, puxo de manifesto a finais do ano pasado que por volta de 44% dos profesionais sanitarios sufriran un nivel alto de estrés e que 37% estivo deprimido; segundo os datos a nivel de Estado español. Os estudos sobre o impacto psicolóxico da Covid-19 nos profesionais sanitarios ofrece cifras moi preocupantes.
Por exemplo, aproximadamente 60% dos profesionais sanitarios sufriu trastornos mentais durante a pandemia e máis da metade non se recuperou ano e medio despois. Ademais, desde a chegada da Covid, 65% dos traballadores sanitarios experimentaron problemas xerais de saúde.
O problema, logo, vai máis alá da "fatiga pandémica". No servizo de Psiquiatría do Complexo hospitalario universitario de Ourense informaban que nos peores meses recibían entre 300 e 500 chamadas telefónicas de profesionais sanitarios pedindo apoio ou asesoramento polo impacto da pandemia na súa saúde mental. Carmen Barral, do Colexio Médico da Coruña, indicaba que coa pandemia duplicou a síndrome de "traballador queimado" entre o persoal sanitario. Insomnio, estrés crónico, desmotivación e mesmo depresión, son cadros que figuran entre os problemas de saúde no persoal sanitario da Galiza.
Investigadores do Hospital del Mar enquisaron 10.000 persoas de 18 centros sanitarios no Estado: 14,5% das enquisadas presentaban un "trastorno mental discapacitante," patoloxía que afectaba á súa vida profesional e persoal".
"A complicada situación que vivimos ten un impacto tremendo no funcionamento do sistema sanitario, mais sobre todo na saúde mental dos médicos, póndoos a proba como profesionais e como persoas", concluía a psiquiatra María Fe Bravo.
