Rosalía na Compostela que ti coñeces e paseas

E pregúntasme ti por que teimo en reivindicar a compostelanidade de Rosalía? Ao falar dela acórdanos a Casa da Matanza e Padrón e considerámola "a padronesa" por excelencia. Mais Rosalía naceu no actual Santiago e, aínda que intermitentemente, mora nesta cidade durante 23 anos, case a metade da súa vida. É certo que súa nai, Teresa de Castro, a filla máis nova dos fidalgos do Pazo de Arretén, era de e vivía en Padrón, e que seu pai, José Martínez Viojo, era crego na Colexiata de Iria, mais, como demostrou Sagrario Abelleira cos documentos achados en 2021 no Arquivo Histórico Diocesano do Arcebispado de Madrid, Rosalía ve a luz a 23 de febreiro de 1837. E non nace nin en Padrón nin en Compostela, senón no pequeno concello de Conxo, no lugar dos Agros da Barreira, nunha casa do Camiño Novo, como aínda lle chaman os picheleiros e picheleiras de sempre á zona da actual praza de Vigo, que daquela formaba parte de Conxo. A casa natal erguíase no lugar onde o concello de Compostela na honra da Rosalía levantou un monólito en 1982. Quen nos ía dicir que esa parte do ensanche compostelán fora municipio independente desde 1835 e logo incorporado a Santiago en 1925? Por tanto, como adoitaba repetir Carvalho Calero nas súas aulas, Rosalía naceu conxeira! A 24 de febreiro de 1837 acristianan a nena María Rosalía Rita na capela do Grande Hospital Real, transformado hoxe no Hostal dos Reis Católicos. Tanto Conxo como as súas aldeas aparecen na súa obra, fíxate como a beleza do lugar natal se mestura co seu estado de ánimo no poema En Cornes: Fermoso campo de Cornes, cando te crobes de lirios, tamén se me crobe a ialma de pensamentos sombrisos; de Cornes, lindo lugare, que cruzan tantos camiños, anque cuberto de rosas, as rosas tamén fan guizos. (...) Convidando a meditare, soan de Conxo as campanas... (Follas Novas) Saberás que en 1847 xa reside en Santiago coa nai, mais a primeira documentación sitúaa entre 1850 e 1854 na rúa Bautizados, nº 10. Non busques a casa, non, nin a entrada, porque a oculta unha construción de madeira verde, que agocha a daquela chamada praciña de Tras o Peso! Desapareceron da nosa vista tras un dos telderetes temporáneos para produtos de tempada que se instalaban en diversas prazas e lugares da cidade: este acabou por converterse en comercio definitivo e cerrar a praciña. Nesta casa vive o terríbel ano da fame, o inverno de principios de 1853, que a marca profundamente e que relata Murguía en Ignotus de Os precursores. En setembro dese ano vai á festa da Barca de Muxía con Eduarda Pondal, que alí morre de tifo, a quen lle adica o texto Las literatas. Carta a Eduarda (1866): Pero es el caso, Eduarda, que los hombres miran a las literatas peor que mirarían al diablo, y este es un nuevo escollo que debes temer, tú, que no tienes dote. Unicamente alguno de verdadero talento pudiera, estimándote en lo que vales, despreciar necias y aun erradas preocupaciones; pero... ¡ay de ti entonces!, ya nada de cuanto escribes es tuyo, se acabó tu numen, tu marido es el que escribe y tú la que firmas. Yo, a quien sin duda un mal genio ha querido llevar por el perverso camino de las musas, sé harto bien la senda que en tal peregrinación recorremos. Por lo que a mí respecta, se dice muy corrientemente que mi marido trabaja sin cesar para hacerme inmortal. Verso, prosa, bueno o malo, todo es suyo; pero sobre todo lo que les parece menos malo, y no hay principiante de poeta ni hombre sesudo que no lo afirme. ¡De tal modo le cargan pecados que no ha cometido! Enfadosa preocupación, penosa tarea, por cierto, la de mi marido, que costándole aún trabajo escribir para sí (porque la mayor parte de los poetas son perezosos), tiene que hacer además los libros de su mujer, sin duda con el objeto de que digan que tiene una esposa "poetisa" (esta palabra ya llegó a hacerme daño) o novelista, es decir, lo peor que puede ser hoy una mujer. Non sei se cho contaran, pero no Santiago do século XIX había variados centros de ocio: casa de comedias, teatro, cafés, sociedades de recreo, veladas musicais e literarias en casas particulares e, ademais, os "teatros-circo", locais onde temporalmente se facían representacións teatrais e circenses, para o que montaban estruturas de ferro con gradas e palcos de madeira. A adolescente Rosalía medra en Compostela vinculada ao edificio do exclaustrado convento de San Agostiño, destinado daquela a diversas actividades: certa parte alugábase, tendo arrendados alí dous cuartos Teresa de Castro en 1855; no patio ou claustro, de 1849 a 1893 funcionou o Teatro-circo Olímpico; unha grande parte ocupábaa un centro educativo e social, o Liceo da Xuventude, cuxo regulamento de 1848 marca o obxectivo de "instruír por medio da literatura e das Belas Artes, con actividades organizadas en catro seccións: música, debuxo, literatura e declamación". Asiste ás aulas do Liceo onde fai amizades para toda a vida e afianza a ideoloxía rexionalista. Forma parte do grupo de teatro, actúa nun mínimo de seis obras no Teatro-circo Olímpico e acubilla a idea de chegar a ser actriz profesional. Para triunfar no teatro ou na literatura, en abril de 1856, marcha para Madrid onde coñece a Manuel Murguía e casan en outubro de 1858. A parella quere vivir en Compostela polo que retornan en decembro de 1858. Residen nunha fonda na rúa da Conga nº 1, onde se fan amigos do estudante de farmacia Ánxel Baltar Varela, futuro alcalde de Padrón e grande protector do matrimonio. 1859 supón dúas grandes alegrías: a primeira filla, Alejandra, e a primeira novela, La hija del mar, dedicada a Murguía: A ti, que eres la persona a quien más amo, te dedico este libro, cariñoso recuerdo de algunos años de felicidad, que, como yo, querrás recordar siempre. Juzgando tu corazón por el mío, creo que es la mejor ofrenda que pueda presentarte tu esposa". O prólogo é un alegato en defensa das mulleres: Antes de escribir la primera página de mi libro, permítase a la mujer disculparse de lo que para muchos será un pecado inmenso e indigno de perdón, una falta de que es preciso que se sincere [...] Protestaron eternamente contra la vulgar idea de que la mujer solo sirve para las labores domésticas, y que aquella que, obedeciendo tal vez a una fuerza irresistible, se aparta de esa vida pacífica y se lanza a las revueltas ondas de los tumultos del mundo, es una mujer digna de la execración general. No quiero decir que no, porque quizá la que esto escribe es de la misma opinión. [...] La vanidad, ese pecado de la mujer, de que ciertamente no está muy exento el hombre, no entra aquí para nada: un libro más en el gran mar de las publicaciones actuales es como una gota de agua en el Océano.[...] Porque todavía no les es permitido a las mujeres escribir lo que sienten y lo que saben. Por mor do traballo, marchan para A Coruña e Vigo, mais a fins de 1859 Rosalía torna á casa onde vive a nai Teresa coa neta Alejandra na Rúa do Vilar, nº 20, situada preto do Teatro Principal de Santiago, construído entre 1840 e 1841 no edificio da antiga casa de comedias e con capacidade para máis de 400 espectadores, ante os que Rosalía interpreta o seu derradeiro papel teatral en xaneiro de 1860, nunha obra benéfica a favor dos feridos na guerra de África (1859-60). Contratan a Murguía en Madrid e Rosalía vai con el... Embora o obxectivo era viviren en Compostela, ao ela volver, a 15 de decembro de 1861 cóntalle por carta a seu home: "En Santiago hace un frío espantoso [...] Jamás he visto tanta soledad, tanta tristeza, un cielo más pálido. [...] Por ahora me encuentro aquí en extremo descontenta. Santiago no es una ciudad; es un sepulcro". Mais xa ves: de 1861 até 1869 residen "no sepulcro". Trasládanse para o nº 7 da Praza da Universidade en 1863, ano en que lle editan Cantares Gallegos. En 1866 van para a Rúa Mazarelos, nº 12 e publica a novela Ruínas. Gusta de pasear por San Lourenzo e arredores: Mi querido Manolo: (...) Te confieso que paso momentos bastante tristes, aun cuando los hermosos días que están haciendo parece que me dejan respirar algo más libremente. Ayer fui a paseo con Peregrina Compañel y con Tomás, y entramos en San Lorenzo. Excuso decirte cuánto me acordaría de ti. Vi aquel patio plantado de bojes con aquella fuente profunda y aquella virgen de piedra, todo lo cual me ha dejado encantada. ¡Qué silencio tan inmenso! ¡Y tú nunca has querido llevarme allí! De buena gana hubiera pagado una habitación en San Lorenzo para poder escribir en aquel claustro. Es imposible que no saliese una cosa buena. (...) As alusións ao convento convertido en pazo son recorrentes na súa obra, xa en Flavio (1861) ou en "San Lourenzo" de Follas Novas: E por eso ó mirar cal nos campos de novo abrochan as rosas dixen: "¡En onde, Dios mío, irei a esconderme agora!". I ó bosque de San Lourenzo me encamiñei silenciosa. Mira ti, de novo mudan de casa, á rúa Callobre, actual Caldeiraría, nº 40, onde residen desde 1866 até 1869. Nela viven a ilusión da Revolución de 1868, a Gloriosa, e nace a segunda filla, Aura. Desde 1869 residen en Simancas, Madrid e A Coruña, mais en 1875 Murguía cesa no seu traballo no Arquivo de Galicia e retornan a Compostela. Na súa última etapa compostelá, Rosalía vive na rúa da Senra, nº 17. Mitiga as súas tristuras percorrendo a cidade desde a súa casa até a igrexa de San Martiño Pinario, onde encontra consolo na imaxe de Santa Escolástica, á que lle adica o poema que amosa as súas sensacións ante a catedral, o Santiago da fachada de Raxoi, o arco de Xelmírez... [...] Después, la catedral..., palacio místico de atrevidas románicas arcadas, y con su Gloria de bellezas llena, me pareció al mirarla que quería sobre mi frente desplomar, ya en ruinas, de sus torres la mole gigantesca. Volví entonces el rostro, estremecida, hacia donde atrevida se destaca del Cebedeo la celeste imagen, como el alma del mártir, blanca y bella y vencedora en su caballo airoso, que, galopando en triunfo, rasga el aire. Y bajo el arco oscuro, en donde eterno del oculto torrente el rumor suena, me deslicé cual corza fugitiva (...) (En las orillas del Sar) Fálanos da fonte da Serena na rúa Virxe da Cerca e da rúa das Trompas no poema "Sin terra" de Follas Novas, onde parece reflectir momentos dramáticos da súa propia vida como o enterro da nai (1862), do fillo Adriano (1876) e da filla Valentina (1877), xa que As Trompas era o camiño polo cal ían os enterros que se dirixían ao cemiterio de San Domingos de Bonaval. ¡Calade, ouh, ventos nouturnos, Cala, fonte da Serena, Que alá por cabo das Trompas Quero oir quen chega! Calaron os ventos todos xurrou a fonte mais queda, E vin que iban a enterrare O corazón dela. Saberás que a precariedade económica os forzou en 1880 a írense vivir cos parentes das Torres da Hermida en Dodro até que, en outubro de 1882, rematan por alugar a casa da Matanza, en Padrón, onde vive a familia até a morte da nai en xullo de 1885. Ela despediuse de Compostela e eu despídome de ti co ¡Adiós! de Follas Novas: ¡Adiós! montes e prados, igrexas e campanas, ¡adiós! Sar e Sarela, cubertos de enramada, ¡adiós! Vidán alegre, moíños e hondanadas, Conxo, o do craustro triste i as soedades prácidas, San Lourenzo, o escondido, cal un niño antre as ramas, Belvís, para min sempre o das fondas lembranzas, Santo Domingo, en donde canto eu quixen descansa, Vidas da miña vida, anacos das entrañas, (...) ¡Adiós!, sombras queridas; ¡adiós!, sombras odiadas outra vez os vaivéns da fertuna pra lonxe me arrastran. Cando volver, se volvo, todo estará onde estaba; os mesmos montes negros i as mesmas alboradas, do Sar e do Sarela mirándose nas augas; os mesmos verdes campos, as mesmas torres pardas, da catedral severa, ollando as lontananzas, Mais os que agora deixo, tal como a fonte mansa, ou no verdor da vida, sin tempestás nin bágoas, ¡cánto, cando eu tornare, vítimas da mudanza, terán de presa andando na senda da desgracia! E eu…, mais eu, ¡nada temo no mundo! que a morte me tarda! E decátaste agora de por que teimo en reivindicar a compostelanidade de Rosalía?