Peóns, coches, bicis e transporte nunha mesma rúa: Clara Campoamor, eixo da intermodalidade en Santiago
Case tres anos despois da súa apertura, esta rúa converteuse nunha das vías principais de Santiago de Compostela. Nela, conviven os vehículos privados, as bicicletas, os peóns e o transporte público, tren e autobús, favorecendo a conexión entre os distintos modos de transporte. Podes acudir en bicicleta á estación, camiñar ao apearte do autobús ou combinar o vehículo co ferrocarril.
A iniciativa mellorou así o acceso á estación intermodal, favorecendo o transporte público, e creando accesos seguros para ciclistas. Este ambicioso proxecto converteu ademais a rúa Clara Campoamor nunha parte esencial dos percorridos a pé entre dúas zonas da cidade que antes estaban mal conectadas: os barrios de Pontepedriña e o Ensanche.
A conexión dos distintos modos de transporte
A intermodalidade é polo tanto un dos principais eixos desta reordenación. Nesta vía de acceso á estación intermodal, que serve tanto para autobuses como para trens, tamén se incorpora a mobilidade ciclista e peonil. O obxectivo é conectar de maneira eficiente diferentes modos de transporte, reducindo así a dependencia do vehículo privado, nunha cidade onde esta é unha opción habitual.
A nova función da rúa Clara Campoamor como vía de acceso á estación intermodal permitiu a circulación dos autobuses dende o norte e o sur, facilitando as manobras de entrada e saída da estación. Ademais, promoveu a permeabilidade entre os distintos medios de transporte e os espazos urbanos adxacentes, como as zonas naturais próximas ao río Sar.
Este proxecto tamén ten en conta a calidade do ambiente urbano, beneficiando a cidadanía coa creación de espazos máis amigábeis e menos contaminados. A reordenación da rúa Clara Campoamor foi deseñada cunha visión de racionalización técnica e económica, aproveitando a infraestrutura existente na medida do posible e asegurando que os obxectivos de sostibilidade sexan prioritarios.
Esta reordenación do vial Clara Campoamor é un claro exemplo de como o investimento en mobilidade sustentábel pode mellorar a calidade de vida na cidade e reducir o impacto ambiental. Conectando barrios previamente illados e fomentando o transporte público e a mobilidade ciclista, Santiago de Compostela camiña cara a un futuro máis sustentábel e accesíbel para a súa veciñanza.
A colaboración entre o Concello de Santiago e a Unión Europea
O investimento total deste proxecto ascendeu aos 1,6 millóns de euros, financiados nun 80% polos fondos FEDER e nun 20% polo propio Concello de Santiago. Grazas a esta colaboración entre a administración municipal e os fondos europeos, a cidade beneficiouse dunha maior conectividade do transporte, repercutindo polo tanto nunha redución das emisións de CO2.
Dende unha visión global da estratexia EDUSI, a reordenación do tráfico na rúa Clara Campoamor súmase a outras actuacións en toda a cidade, financiadas con fondos europeos. EDUSI englóbase no Programa Operativo Plurirrexional de España 2014-2020, cofinanciado por Fondos Estruturais da Unión Europea, FEDER, e contou coa participación cidadá para decidir as súas actuacións. En total, a estratexia EDUSI permitiu un investimento total de 12,5 millóns de euros, para que, da man da Unión Europea, Santiago de Compostela se converta nunha cidade máis sustentábel e integradora.