A Xunta Electoral de Zona de Ourense emitiu esta cuarta feira unha resolución na que determina que o alcalde de Ourense e candidato á reelección por Democracia Ourensá, Gonzalo Pérez Xácome, cometeu infraccións electorais tanto na estrea das ramplas mecánicas da rúa da Concordia, a pasada sexta feira, como coa emisión de publicidade prohibida en Auria TV, a súa canle de televisión.
A respecto das ramplas, na resolución con data desta cuarta feira, a Xunta Electoral alega que se trata dunha estrea polo alcalde, "que non acode só ou entre un tumulto para probalas, senón que se acompaña de membros do seu partido o día que as obras terminaron e ponse en funcionamento, polo que é un acto de inauguración".
A Xunta Electoral pronúnciase após a presentación de denuncias por parte do BNG e do PSdeG. Recolle tamén que se opta por "refugar" as explicacións de Xácome ao considerar que son "pouco consistentes".
🚶♀️🚶🏻♂️OUrense entra en el siglo XXI.
— Gonzalo Pérez Jácome -Alcalde de Ourense- (@gonzalojacome) May 19, 2023
🎉 Se finalizan los PASILLOS MECÁNICOS en c/ Concordia, ya en funcionamiento.
2️⃣0️⃣ Es la primera de las veinte que haremos en la ciudad en distintos enclaves. pic.twitter.com/ON89aXitvO
Así, ratifícase que houbo infracción electoral e ordénase a apertura do correspondente expediente sancionador onde "depurar as correspondentes responsabilidades". A resolución tamén dá a razón ao PSOE nunha denuncia presentada sobre a emisión de publicidade electoral prohibida en Auria TV, da que é propietario o rexedor ourensán. "En Auria TV publicítanse os logros conseguidos por Xácome, candidato de Democracia Ourensá, o que supón unha publicidade electoral prohibida en medios privados", argumenta.
Desestima, con todo, outra denuncia presentada polo PP en relación a un vídeo difundido en Auria TV no que se parodia unha escena de A vida de Brian para promocionar os supostos logros do Goberno de Xácome.
Prohibida unha festa o sábado en Lugo
Por outra parte, a Xunta electoral requiriu ao Concello de Lugo que non leve a cabo as actividades festivas programadas para este sábado, xornada de reflexión, no barrio da Milagrosa, unha decisión que o Consistorio decidiu recorrer. Nun comunicado, o Goberno que lidera a socialista Lara Méndez lembra que se trata de "accións de continuidade de dinamización económica" que se realizan durante todo o ano dentro do programa 'Localmente Lucense'.
A festa foi levada á xunta electoral por parte de Luís Latorre, a quen o Consistorio afea que denunciase incluso a cor usada, o vermello, xa que é o "aprobado" na corporación local como imaxe da entidade local.