![[Imaxe: FB] Á dereita, Xosé Crespo, no centro, Román Rodríguez](/asset/thumbnail,1280,720,center,center/media/nosdiario/images/2018/05/20/2018052012550051758.jpg)
A APAC advirte na denuncia que se produciron 38 contratacións no concello con irregularidades por “afinidades políticas ou persoais” entre os anos 2004 e 2015. Contratacións que, tal e como adiantou Praza Pública, tiveron o visto e prace da Xunta de Goberno de Lalín, formada na época, entre outros, por Xosé Crespo, ex alcalde de Lalín, xefe da oposición e senador do PP, e por Román Rodríguez, hoxe conselleiro de Educación e quen fora concelleiro na vila entre 1999 e 2015. A APAC estende a denuncia a todas as persoas que integraban a Xunta de Goberno entre 2004 e 2015.
A demanda presentada no Xulgado número 2 de Lalín está acompañada dun informe do xefe do persoal do Concello de Lalín e mais da acta da Xunta de Goberno de 12 de decembro de 2012, cun informe do secretario municipal, que darían conta das irregularidades que lanza á luz pública a APAC.
A denuncia da APAC, que foi presentada pola concelleira Lara Rodríguez, pon de manifesto que o Concello, a través de contratos por obra e servizo ou eventuais, acababa dándolle traballo de forma permanente ás persoas beneficiadas. Así, os contratos prolongábanse no tempo sen que existise ningunha resolución de Alcaldía nin acordos da Xunta de Goberno que apoiasen a continuidade dun total de 38 contratacións concatenadas, algunha mesmo superior aos dez anos.
Entre 2004 e 2006 o Grupo Municipal do PSOE xa presentara denuncias en relación ás oposicións convocadas para cubrir trece postos de funcionariado no Concello.
