Xácome someterá a unha cuestión de confianza 28 millóns de euros en modificacións de crédito se non saen adiante no pleno

O alcalde de Ourense, Gonzalo Pérez Xácome (Democracia Ourensá), avanzou que someterá a unha cuestión de confianza dúas modificacións de crédito, de máis de 25 millóns de euros e case 3 millóns respectivamente, se estas non saen adiante no pleno extraordinario que decorrerá esta quinta feira para a súa aprobación inicial.

Segundo recolle a Lei 5/1985, o alcalde pode recorrer a unha cuestión de confianza "unha vez por ano", de tal forma que, se esta tampouco sae adiante, os grupos en oposición terán que presentar, nun prazo de un mes, unha moción de censura con candidato alternativo á Alcaldía. Pola contra "entenderase outorgada a confianza e aprobado o proxecto".

Xácome recalcou que a agrupación de partidas orzamentarias en modificaciónes de crédito "é unha práctica habitual en todas as administracións", e pediu aos grupos da oposición (BNG, PSdeG e PP) que apoien ambas as propostas "con voto favorábel", xa que estas "inclúen proxectos de especial relevancia para a cidade".

"Todos están a favor das obras que se queren realizar, falaremos cos demais grupos nas próximas horas e días e esperamos que voten a favor ou se absteñan", engadiu o alcalde nun comunicado.

Actuar "con responsabilidade"

Pola súa banda, os socialistas recalcaron que actuarán "con responsabilidade" e "priorizando os intereses da cidadanía", sen "ningún tipo de chantaxe ou ameaza do alcalde".

Consultada por medios nunha rolda de prensa sobre a decisión de Xácome, a portavoz do PSdeG no Concello de Ourense, Natalia González, insistiu en que Xácome "faga o que queira" e "o que considere que lle corresponde", e informou que o grupo municipal socialista reunirase para decidir o voto en pleno.

Así mesmo, González lamentou que, en canto a cuestións económicas, "hai algunhas que suscitan unanimidade" e "son apoiadas pola oposición", pero noutros casos "o PP bota o salvavidas" ao grupo de Goberno "por intereses cruzados". "Desgraciadamente isto sempre ten o mesmo desenlace", engadiu.

O PP pide retirar as modificacións

Con todo, os populares no Concello de Ourense solicitaron a retirada de ambas as modificacións da orde do día ao considerar que as partidas económicas incluídas "deben ditaminarse, debaterse e votarse por áreas".

Tal e como trasladou o grupo popular municipal nun comunicado, esta fórmula "limita a capacidade" da oposición para "valorar e votar cada asunto con responsabilidade e rigorosidade". "Necesitamos sentido común", trasladou a portavoz do PP no Concello de Ourense, Ana Méndez.

Nesta liña, Méndez insistiu en que "non é normal" que se xunte no mesmo expediente de modificación de crédito "cuestiones tan distintas" como convenios sociais, sentenzas xudiciais ou proxectos urbanísticos, e recalcou que "o mínimo é que cada materia se ditamine independentemente".

Así mesmo, os populares lembraron que cando Xácome estaba na oposición "sempre pedía que os expedientes se debatesen e votasen separados por áreas" e "se non, votaba en contra". "O que antes criticaba con vehemencia, agora aplícao como forma habitual de gobernar", engadiu Méndez.